Andrea Björk Andrésdóttir, hönnuður og grínari, og Steindór Grétar Jónsson, blaðamaður og grínari, mæta með hlaðvarpið sitt Bíó Tvíó á veitingastaðinn Röntgen, Hverfisgötu 12, í kvöld. Að þessu sinni taka þau fyrir kvikmyndina Stella í framboði og jafnvel mun Eurovision-bíómyndin einnig koma við sögu.
Bíó Tvíó er hlaðvarp um íslenskar kvikmyndir, en Andrea og Steindór einsettu sér að horfa á hverja einustu íslensku kvikmynd og taka eina fyrir í hverjum þætti og ræða hana á léttu nótunum, af takmarkaðri þekkingu. Andrea og Steindór eru bæði búsett í Berlín og því er um einstakt tækifæri að ræða til að sjá berum augum hvernig töfrar hlaðvarpsins verða til.
Umfjöllunarefni tvíeykisins í kvöld, Stella í framboði, er sjálfstætt framhald hinnar ástsælu myndar Stella í orlofi. Myndin kom út 2002 og með aðalhlutverk fara Edda Björgvinsdóttir, Þórhallur Sigurðsson og Gísli Rúnar Jónsson.
Stella í framboði er aðgengileg á RÚV, fyrir þá sem vilja mæta undirbúnir þegar Bíó Tvíó fjallar um myndina í kvöld á Röntgen klukkan 20:00.