„Það eru einn til tveir vitar við hvern fjörð yfirleitt. Við erum búin að skoða allavegana sjö vita,“ segir Bjartey Elín Hauksdóttir dansaranemi og annar af meðlimum í Listahópnum „Vitranir“. Með Bjarteyju í hópnum er Almar Blær Sigurjónsson leikaranemi. Bæði eru þau í Listaháskóla Íslands og hefja lokaárið í skólanum í haust.
Vitranir er verkefni á vegum Listahóps Austurlands sem er í Skapandi sumarstörfum á Austurlandi. Er þetta annað sumarið sem Skapandi sumarstörf eru í boði á Austurlandi. „Þetta gekk það vel í fyrrasumar að það var ákveðið að hafa þetta aftur í ár og fjölga úr 10 manns í 14,“ segir Almar sem var einnig í sama starfi í fyrrasumar.
„Við sóttum um með ákveðna hugmynd sem hefur þróast í sumar. Okkar hugmynd var að sameina okkar listform, leiklist og dans og vinna með óhefðbundið leikrými,“ segir Almar
Drauma vitann fundu þau í Breiðdal. „Við vorum bara að leita eftir vitalegasta vitanum. Streitisviti er á fimm hæðum og mun sýningin ferðast á milli hæða,“ segir Bjartey.
Bjartey og Almar hafa skoðað sögu staðarins og sögu vita yfir höfuð. Sýningin mun verða fyrir áhrifum umhverfisins og verður hún meira huglæg heldur en að þetta sé ákveðinn söguþráður. Sýningin verður 20-30 mínútur og komast í mesta lagi þrír gestir á hverja sýningu.
„Við ætlum að bjóða fólki inn í ákveðinn heim. Við ætlum okkur að skapa ákveðið andrúmsloft í þessu hráa rými sem vitinn er með því að samtvinna dans og leiklist,“ segja Almar og Bjartey. Þau eru sammála því að það séu forréttindi að fá að vinna við listsköpun í sumar.
„Við heilluðumst af vitanum sem hugmynd. Það er svo afskekkt og einmanaleg hugmynd að vera viti eða vitavörður. Það er samt svo falleg pælingin að búa til hús til þess að minnka líkur á sjóslysum,“ segir Almar. Bjartey segir drauminn vera að ferðast með sýninguna í fleiri vita um landið til að byrja með og fara svo í vita erlendis.
„Aðal hindrunin í þessu ferli var að fá leyfi til að sýna í vitanum,“ segir Bjartey. Almar bætir því við að það þurfti að athuga með alls konar öryggismál og fleira sem tengist starfsemi vitans. „Auðvitað þarf að fara varlega í þessu rými og erum við mjög þakklát fyrir að hafa fengið leyfið.“
Sýningin er hluti af „Innsævi“ Listahátíð Fjarðarbyggðar sem hefst á fimmtudaginn og stendur í mánuð. Hátíðin er haldin í fyrsta skipti í ár. Almar og Bjartey munu sýna þrjár sýningar á dag í fjóra daga þann 28. – 31. júlí með möguleika á aukasýningum.