Fjöldi sérfræðinga hefur spáð aukinni skilnaðartíðni í kjölfar kórónaveirufaraldursins. Hér gefur að líta þekkta Íslendinga sem skildu eða slitu ástarsamböndum á tímum kórónaveirunnar. Nú taka vafalaust við nýir og spennandi tímar hjá þessu efnilega og eftirsóknarverða fólki.
Ein efnilegasta söngkona landsins er á lausu. Bríet Ísis Elfar vakti fyrst athygli í Iceland Got Talent og var valin bjartasta vonin á Íslensku tónlistarverðlaununum árið 2019. Hún var um árabil í sambandi með Halldóri Karlssyni, sem hefur gert garðinn frægan í ýmsum íþróttum og líkamsrækt.
Snæfríður Ingvarsdóttir, ein efnilegasta leikkona landsins, og hinn hæfileikaríki Högni Egilsson, söngvari Hjaltalín, hættu saman eftir sex ára samband. Snæfríður útskrifaðist úr leiklist frá Listaháskólanum vorið 2016 og hefur síðan slegið í gegn í hverju leikverkinu á fætur öðru og var tilnefnd til Eddunnar, strax ári eftir að hún útskrifaðist.
Guðríður Torfadóttir, eða Gurrý eins og hún er kölluð, er nýskilin að borði og sæng við eiginmann sinn til sautján ára. Gurrý er einn vinsælasti þjálfari landsins og var þjálfari í raunveruleikaþættinum Biggest Loser Ísland.
Fyrrverandi fréttakonan og almannatengillinn Kristín Ýr Gunnarsdóttir er laus og liðug – bæði við COVID og karlmenn. Kristín fékk veiruna en er frísk og á lausu. Hún og alþingismaðurinn Kolbeinn Óttarsson Proppé höfðu verið að rugla saman reytum.
Athafnakonan og áhrifavaldurinn Manuela Ósk Harðardóttir og dansarinn Jón Eyþór Gottskálksson hættu saman, eftir um hálfs árs samband. Þau kynntust eins og frægt er orðið í þáttunum Allir geta dansað á Stöð2.
Einn vinsælasti innanhússarkitekt landsins, Hanna Stína Ólafsdóttir, er nýskilin og á lausu. Hanna Stína er mjög eftirsótt fyrir smekkvísi sína og einstakt auga fyrir fegurð og notagildi. Hún er vinsæl og vinmörg, enda geislar af henni hvar sem hún fer.
Athafnakonan Anna Lilja Johansen og Grímur Alfreð Garðarsson, einn eigandi Best Seller veldisins, fóru sitt í hvora áttina fyrir stuttu. Anna Lilja þykir ákaflega smekkleg og hefur komið að stofnun fatahönnunarmerkja á borð við Another Creation, en hún lauk nýverið mastersprófi í fjármálum.
Áhrifavaldaparið Brynjólfur Löve Mogensen og Kristín Pétursdóttir hættu saman í vor. Þau voru eitthvert vinsælasta par Íslands og mjög dugleg að deila myndum og myndskeiðum hvort af öðru á samfélagsmiðlum. Brynjólfur starfar sem markaðsstjóri KIWI og Kristín er leikkona.
