Úrvals Útsýn mun hefja ferðir til Tenerife og Alicante í byrjun júlímánaðar. Þetta staðfestir Þórunn Reynisdóttir, framkvæmdastjóri ferðaskrifstofunnar í samtali við DV. Hún segir að Íslendingar séu sumir orðnir sólþyrstir.
„Við bindum vonir við það að fólk fari í sólina. Það er alltaf ákveðinn hópur fólks sem gefur ekkert eftir til að komast í góðann hita. Núna verða auðvitað færri ferðamenn og því munu Íslendingarnir njóta sín vel. Spánverjar fagna því verulega að fá Íslendingana aftur.“
Flug til og frá Tenerife mun hefjast 11. júlí og til og frá Alicante þann 13. júlí. Frá því mun vikulegt flug til þessara staða hefjast. Þórunn segir að áhuginn hafi verið mikill, bæði í þessar fyrstu ferðir og svo líka í fyrirhugaðar haustferðir.
„Við ætlum bara að henda í þetta og sjá hvort að landinn sé ekki enn þá sólarþyrstur“
Þórunn segir að Íslendingar ættu að hafa áhuga á að fara til útlanda, á meðan að þeir vilja fá ferðamenn hingað til lands.
„Á þessum stöðum er allt að opna, allt að fara í normal ástand. Fyrir utan þessar hefðbundnu COVID-reglur sem allir þekkja.“
Hún segir að ferðaskrifstofan muni vera dugleg að miðla öllum mikilvægum skilaboðum til farþega vegna COVID-mála og hvetur fólk endilega til að hringja í skrifstofuna hafi það einhverjar fyrirspurnir.