YouTube-stjörnurnar og hrekkjalómarnir Josh Pieters og Archie Manners plötuðu Carole Baskin í fyrsta viðtalið sem hún hefur veitt eftir að heimildaþáttaröðin Tiger King kom út á Netflix.
Tiger King hafa slegið í gegn um allan heim undanfarið. Þættirnir fjalla um tígrisdýra kónginn Joe Exotic. Hann var dæmdur í 22 ára fangelsi fyrir tilraun til manndráps er hann reyndi að fá leigumorðingja til að myrða erkióvin sinn, Carole Baskin, en þar að auki var hann dæmdur fyrir dýraníð.
Carole Baskin rekur Big Cats Rescue og er einnig til umfjöllunar í þáttunum. Árið 1997 hvarf eiginmaður hennar og auðmaðurinn Don Lewis með dularfullum hætti, og aldrei spurðist til hans síðar. Þrálátur orðrómur, sem þættirnir taka fyrir, er á þá leið að Carole hafi orðið eiginmanni sínum að bana, en það hefur aldrei verið sannað.
Carole var mjög ósátt við Tiger King og taldi þættina ekki gefa rétta mynd af sér. Hún var sérstaklega ósátt við að vera bendluð við hvarf eiginmanns síns og hefur hingað til neitað að koma fram í viðtölum.
Archie Manners og Josh Pieters þóttust vera framleiðendur á vegum spjallþáttastjórnandans Jimmy Fallons sem er með þættina The Tonight Show. Carole Baskin samþykkti að veita viðtalið með einu skilyrði, Fallon myndi ekki spyrja um Don Lewis eða Tiger King.
Eftir mikinn undirbúning var loksins komið að þessu. Þeir notuðu hljóðbrot úr gömlum þáttum svo það hljómaði eins og Jimmy Fallon væri hinum megin við skjáinn.
Það er hægt að sjá allt ferlið, frá byrjun til enda, í myndbandi á YouTube. Myndbandið hefur þegar fengið 1,4 milljón áhorf.
Horfðu á það hér að neðan.
Sjá einnig: Fengu „hötuðustu konu Bretlands“ til að taka á móti verðlaunum sem eru ekki til