Daði og Gagnamagnið sendu í dag frá sér útgáfu af laginu sem vann Söngvakeppni Sjónvarpsins árið 2020, Think about things og hefði orðið framlag okkar Íslendinga í Eurovision keppninni sem því miður var svo blásin af sökum COVID-faraldursins.

Þessi útgáfa er svokölluð sóttkvíar-útgáfa sem byggir á því að meðlimir hljómsveitarinnar hittast ekki heldur tekur hver upp sinn hlut í sínu horni. Þetta form af lögum hefur náð vinsældum á miðlum á borð við YouTube og sýnir að þó við séum aðskilin, í sóttkví eða einangrun þá getum við enn notið samvista hvert við annað og haft gaman.

Eins og glöggir muna þá voru hljóðfærin sem spilað var á í sviðsetningunni ekki alvöru og því er skemmtilegt að sjá þá meðlimi gagnamagnsins finna sér til dundurs. Daði sjálfur spilar undir, bakraddir hans syngja sína hluti og hinir – Jah sjón er sögu ríkari.