Á miðnætti í kvöld munu strangari reglur taka gildi um samkomubann. Frá og með miðnætti munu allar samkomur þar sem tuttugu manns eða fleiri koma saman vera bannaðar. Einnig loka sundlaugar, líkamsræktarstöðvar, skemmtistaðir, spilakassar og söfn. Starfsemi og þjónusta sem krefst mikillar nálægðar milli fólks verður einnig óheimil. Þar undir falla meðal annars hárgreiðslustofur.
Í tilefni þess ætlar TeamX í samstarfi við Kompaníið og Daða Hendricusson að bjóða upp síðustu klippinguna.
Landsmenn geta nú boðið í síðustu klippinguna og mun allur ágóði renna til söfnunarátaksins Stöndum með Landspítala.
„Þar sem álagið fer hratt vaxandi og þrekvirki eru unnin á hverjum degi,“ kemur fram á vefsíðu uppboðsins.
DV heyrði í Daða sem segir að með þessu séu þau að vekja athygli á samkomubanninu og átakinu til styrktar Landspítalans.
„Það sem við erum að gera er að reyna að fá einhvern pening inn í Landspítalann til að styrkja landspítalann í baráttunni gegn COVID-19. Mér fannst þetta frábært tækifæri og ég vona að fólk bjóði í þetta og styrki gott málefni, og það fær þá eitthvað annað í staðinn,“ segir Daði.
„Ég er tilbúin að taka á móti öllum þeim kröfum sem viðkomandi vill þannig séð, ef hann býður vel og er tilbúinn að styrkja Landspítalann.
Uppboðið er nú komið í 50 þúsund krónur þegar greinin er skrifuð.
Sá sem á hæsta boð klukkan fjögur í dag vinnur síðustu klippinguna. Hér getur þú skoðað uppboðið.
