Marteinn Mosdal, hinn skeleggi talsmaður Ríkisflokksins, ætti að vera flestum landsmönnum kunnur. Hann segist vera kominn með lausn við vanda Landspítalans á Facebook-síðu sinni en markmiðið er líkt og svo oft áður að rétta af hlut ríkissjóðs.
„Það er öllum ljóst að heilsuleysi landans er að sliga Ríkisspítalann. Þessi aumingjaskapur veldur því að spítalinn er troðinn af sjúklingum sem ættu bara að hanga heima hjá sér, í stað þess að þjösnast á ríkinu. Það þarf að laga þessa óreglu sem er búin að ganga alltof langt. Ég …ég meina Ríkisflokkurinn er með lausn á þessum vandræðagangi,“ segir Marteinn.
Hann segir málið raunar ofureinfalt: „Hver og einn hefur rétt á aðgengi að heilbrigðisþjónustu einu sinni á mánuði sem miðast við afmælisdag í mánuðinum. Sá sem er fæddur sjöunda fær aðgang og rétt til heilbrigðisþjónustu sjöunda hvers mánuðar. Þeir sem fæddir eru 31. í mánuðinum verða að sitja af sér mánuði með færri dögum. Sömuleiðis þeir sem eru fæddir 29. febrúar. Með þessu næst sparnaður sem kemur í veg fyrir óþarfa sjúkrabyggingar og að Ríkissjóður sé blóðmjólkaður.“
Ef það var ekki nokkuð ljóst fyrir þá er þetta að sjálfsögðu grín en Marteinn Mosdal er ein dáðasta persóna Ladda, Þórhalls Sigurðssonar. Síðan er ekki á vegum Ladda en síðuhaldari nær nokkuð vel helstu töktum Marteins. Enda sló færslan í gegn og fékk fjölda læka og deilinga.
https://www.facebook.com/170423499646790/photos/a.1022932091062589/2870879956267784/?type=3&__xts__%5B0%5D=68.ARAjRIm63nahwxbTYfWV1L1r-dO9YDO0IQOpLKfrbS2RjhFwHeaJIItJy_s0g-AKzJqhQoyGi-Lgzs-FpXppHwkXiNyucNjdNcYeA_ks1gIJYwToFvU1WvCGougSzq9I1DRyclwtjWaLdCFMHfucj4bxMHwx2Ok_mgHxNtCn4DeTlWAyLH2ut9mGK6Jo8A84AZKZMNVY1pxwbZ4lc8M9nmnbbinxJbxR4CKDjMJn2CyFCx8SzZGPSJKSkLnZ6_ryIezu7TyqmiZjKf8Nyn2oLpHNwZ3QeqeqapMydSG5zbguotANwJ1x0hlUsae63rl5-_Z4w4vui1GYLQYQFmPL6nadBA&__tn__=-R