Guðmundur Oddur Magnússon, betur þekktur sem Goddur, fæddist á Akureyri og hefur starfað við kennslu í grafískri hönnun í rúman aldarfjórðung. Hann skrifar nú sögu starfsgreinar sinnar og er titlaður rannsóknarprófessor Listaháskóla Íslands. Goddur er í yfirheyrslu helgarinnar.
Hvar líður þér best? Mér líður best á Austurlandi, sérstaklega á Seyðisfirði sem er einn besti staður sem ég hef kynnst sem orkuhleðslustöð. Hann er mjög ólíkur öllum stöðum úti á landi sérstaklega að því leyti að vera vinsamlegur útlendingum og fólki með sterkan persónuleika. Maður kemur hlaðinn orku þaðan á haustin og hún heldur manni gangandi í borginni í nokkra mánuði.
Hvað óttastu mest? Microsoft Office 365 – valdbeitingu möppudýra og baunateljara af hvaða toga sem er – bókhald, skattheimtu, stjórnendafundi, Excel-skjöl og bara allt sem Microsoft Office 365 kemur nálægt.
Hvert er þitt mesta afrek? Að verða edrú fyrir aldarfjórðungi.
Furðulegasta starf sem þú hefur tekið að þér? Að vera hljóðfæraleikara í sinfóníuhljómsveit sem gaf út sex 12 tommu vínyl-plötur í boxi og ferðaðist og spilaði í fjórum evrópskum borgum, Basel, München, Vínarborg og Innsbrück.
Hver væri titillinn á ævisögu þinni? Hégóminn var hans akkílesarhæll.
Hvernig væri bjórinn Goddur? Dökkur og laus við allt alkóhól, 0.00%.
Besta ráð sem þú hefur fengið? Að tilfinningagreind sé betri en rökhugsun.
Hvert er leiðinlegasta húsverkið? Mér finnast húsverk alls ekki leiðinleg, en að halda heimilisbókhald fer í taugarnar á mér.
Besta bíómynd allra tíma? Zabriskie Point eftir Antonioni hafði dýpstu áhrifin.
Hvaða hæfileika myndir þú vilja búa yfir? Að vera raunverulega músíkalskur.
Hver er mesta áhætta sem þú hefur tekið? Að fara í listnám.
Hvaða frasi eða orð fer mest í taugarnar á þér? Ekki gera þetta!
Hvað geturðu sjaldnast staðist eða ert góður í að réttlæta að veita þér? Sykur, rjómi og örlítið af berjum.
Hvað er á döfinni hjá þér? Að plana sem minnst.