Haukur Ægir Hauksson, betur þekktur sem rapparinn Haukur H, hefur gengið í gegnum ýmislegt í gegnum tíðina. Hann komst í kast við lögin á sínum yngri árum, glímdi við fíkn en tók síðan aðra stefnu í lífinu og fór í meðferð. Síðastliðin átta og hálft ár hefur hann verið edrú og er í dag orðinn trúaður fjölskyldufaðir.
Haukur er nýjasti gestur Hafsteins Sæmundssonar í hlaðvarpsþættinum Bíóblaður. Þeir ræða saman um kvikmyndir, rapp og margt fleira.
„Ég byrja að semja texta þegar ég var ábyggilega fjórtán ára eða eitthvað. Ég var alinn upp rosalega mikið eiginlega bara úti á landi. Var í fóstri í tólf ár. Ég bjó á Egilsstöðum og svo bjó ég á Akureyri. Á því tímabili byrjaði ég að hlusta mikið á rapp og byrjaði að „stúdera“ það. Það var svolítið á þessum tíma að það voru allir síðhærðir, í Iron Maiden bolum og á hjólabretti. Ef þú hlustaðir á rapp þá varstu eiginlega bara tekinn og barinn. Þá var maður ekki cool. Tímarnir hafa breyst rosalega mikið.“
Haukur sá bíómyndina 8 Mile þegar hann bjó fyrir norðan. Myndin skartar rapparanum Eminem og er lauslega byggð á lífi hans. Myndin hafði gríðarleg áhrif á Hauk og tengdi hann við aðalpersónu myndarinnar.
„Þegar ég flutti norður, þá sá ég 8 Mile í fyrsta skipti og ég varð bara heltekinn af þessu. Ég man þegar ég skrifaði einn af mínum fyrstu rapptextum, þá var ég nýbúinn að horfa á 8 Mile en í myndinni þá er eitthvað gengi á eftir honum. Berja hann í endann. Ég man eftir því að það voru einhverjir jafnaldrar mínir sem ætluðu að berja mig á þessum tíma. Ég var svolítið einn á móti þeim. Ég lifði mig svo inn í myndina. Svo kom ég heim og byrjaði að skrifa rapptexta um þetta allt saman,“ segir Haukur.
Haukur hefur mikinn áhuga á góðum bíómyndum en hans smekkur er nokkuð fjölbreyttur. Haukur horfir á alls konar myndir en þó er ein týpa af bíómyndum sem hann gjörsamlega þolir ekki.
„Ég skal segja þér standardinn fyrir amerískar, rómantískar gamanmyndir. Það er bara eitthvað fólk, skilurðu, einhver gaur og einhver gella. Þau þekkjast ekki neitt og eru að kljást við einhverja hluti í lífinu. Svo kynnast þau og fíla ekkert hvort annað fyrst. Síðan hittast þau aftur og þá kemur eitthvað atriði sem er svona eins og eitthvað sketsaatriði. Þar eru þau að lifa lífinu og hjálpa hvort öðru og það er eitthvað svona lag undir. Eftir það atriði, þá gerist eitthvað. Kemur eitthvað upp á og þau hætta saman, sem er yfirleitt út af einhverju svona kjaftæði sem maður gæti leyst með orðum á núll einni. Þau hætta saman og hann fer aftur til vina sinna eða eitthvað og hún aftur til vinkonu sinnar. Síðan kemur atriði með þeim þar sem þau stara á hafið eða eitthvað og svo byrja þau aftur saman í endann. Mér finnst þetta glatað.“
Í þættinum ræða strákarnir einnig hvort það hefði verið sniðugt að búa til Titanic 2, hvernig karlar í gamla daga áttu erfitt með að tjá tilfinningar, hvaða myndir náðu að hræða Hauk þegar hann var yngri, hvernig álit Hauks á Leonardo DiCaprio hefur breyst með árunum og margt, margt fleira.
Bíóblaður er á YouTube, Spotify og Apple Podcasts.
