Rithöfundurinn og ljóðskáldið Hallgrímur Helgason er sár út í Fréttablaðið ef marka má nýjustu færslu hans á Facebook.
Á þriðjudag sýndi RÚV mynbandsverkið Við skjótum títuprjónum, þar sem Hallgrímur fer með úrval ljóða úr samnefndri bók við trommuleik Þorvaldar Þórs Þorvaldssonar.
Í Fréttablaði dagsins var fjallað lítillega um myndbandið í dálknum Frá degi til dags. Þar var spurt hvort að myndbandið væri í almannaþágu og hvort að efnið væri „sposnað“. Skrifin voru í hæðnistón, sem dæmi var spurt hvort að ekki væri gaman að horfa á málningu þorna í ríkissjónvarpinu.
„Almannaþága
Það er ekki að spyrja að almannaþágunni í starfsemi RÚV. Í fyrrakvöld var birt á sjónvarpsrás þess hálftíma þáttur þar sem ljóðskáld flutti eigin verk undir trumbuslætti. Þetta var stórbrotinn flutningur þar sem nýlega útgefin ljóðabók höfundar var flutt í heilu líki. Og aldeilis var nú flutningurinn áheyrilegur. Þetta þyrfti að gera oftar og þá einnig í almannaþágu. Hvernig væri til dæmis að hafa hálftíma þátt þar sem veggur er málaður í beit eða prjónaður er leisti? Skyldi þetta hafa verið sponsað efni?“
Líkt og áður segir var Hallgrímur ósáttur með þessi skrif og tjáði þá skoðun sína á Facebook. Hann segir Fréttablaðið hafa skotið títuprjóni á sig, og vitnar þar með í titil bókarinnar og myndbandsins. Þá spyr hann hvort að list eigi ekki heima í sjónvarpi.
Færsla Hallgríms hefur vakið nokkurra athygli, en fólk hefur verið óhrætt að hrósa honum fyrir verkið í kommentakerfi færslunnar.
„Fréttablaðið skýtur títuprjóni á okkur í dag fyrir að hafa gert ljóðlistarmyndband og fengið það sýnt á RÚV. Þetta er í húmorsdálkinum þeirra, en eins og oft sér maður ekki hvar hláturinn á að koma. (Það væri alveg ráð að merkja þá staði í textanum með broskarli 😉 ). Gefið í skyn að þetta hafi ekki verið í almannaþágu. Á ekki að vera list í sjónvarpi, ljóð í sjónvarpi? Og svo er slúttað með spurningunni um peninga sem aldrei er langt undan þegar menn vilja koma höggi á list og listamenn. Svarið er jú, við Doddi Thorvaldsson sponsuðum þetta upp í topp!“
Hafi fólk áhuga á að sjá myndband Hallgríms þá er hægt að nálgast það hér.
https://www.facebook.com/hallgrimur.helgason.9/posts/10158618481279178