„Ég er með jólablæti sem brýst gjarnan fram um þetta leyti, árlega.“
Þetta segir Reynir Traustason, ritstjóri Mannlífs, í færslu á Facebook-síðu sinni í gær. „Þessu trúr var ég með risastóra jólamynd á flatskjánum mínum og undurfögur jólatónlist færir mér nauðsynlega ró í amstri dagsins.“
En gamanið átti eftir að grána hjá Reyni. „Skyndilega rofnaði útsending frá YouTube og Þorsteinn Már Baldvinsson, forstjóri Samherja, tók við af Bing Crosby með White Cristmas,“ segir Reynir og á þá við auglýsingar Samherja sem hafa herjað á YouTube-rásum landsmanna síðan í sumar.
„Hann horfði þráðbeint í augu mér og með angurværum svip og döprum, örlítið tárvotum augum sagði hann mér að Helgi Seljan væri slæmur maður. Svo kom Björgólfur staðgengill hans og staðfesti þetta með Helga. Samherjarnir eru búnir að koma sér fyrir í jólalögunum mínum. Og það er sama hvað ég spóla, þeir koma aftur og aftur eins og sending að handan.“