Fjöldi Íslendinga nýtir sér þann valmöguleika að versla í matinn heima í stofu. Heimkaup, Krónan og Nettó senda heim og bjóða meira að segja upp á fría heimsendingu ef verslað er fyrir ákveðna upphæð.
Kristófer Leifsson ætlaði að panta sér tólf dósir af Pepsi Max Lime í gegnum netverslun Heimkaups en brá heldur í brún þegar sendingin skilaði sér.
Unnusta hans, Kristín Harðardóttir Waage, deildi mynd af sendingunni í Facebook-hópnum Fyndna frænka og létu viðbrögðin ekki á sér standa. Greinilegt að margir hafa gaman að þessum bráðfyndnu mistökum úr daglegu amstri á tímum COVID.
„Maðurinn minn ætlaði að panta tólf dósir af Pepsi Max Lime. En hann pantaði óvart tólf kassa! Ég get ekki manninn minn,“ segir hún og hlær.
Yfir 1400 manns hafa brugðist við færslunni. Í samtali við DV segir Kristín að Kristófer hafi ekki tekið eftir verðinu þar sem hann var í vinnunni og var að flýta sér. „En eins gott að okkur finnst báðum Pepsi Max Lime gott,“ segir hún.
Það er ljóst að Kristófer er ekki sá eini sem hefur lent í þessu, en nokkrar konur hafa svipaða sögu að segja.
„Ég pantaði um daginn 6 kassa af íspinnum, en ekki 6 íspinna eins og ég hélt ég væri að panta. Það var samt pínu mikið þegar ég hélt að ég væri að panta 8 glös úr Ikea en pantaði 8 kassa, hver með 4 glösum,“ segir ein kona.
„Ég þekki eina sem ætlaði að panta átta sveppi og fékk átta kíló af sveppum,“ segir önnur.