Ung kona leitar ráða til Dear Deidre, kynlífs- og sambandsráðgjafa The Sun. Hún og systir hennar fóru í DNA-próf og það kom í ljós að þær séu ekki samfeðra.
„Systir mín var að senda inn umsókn um dvalarleyfi í Bretlandi og til þess þurftum við að fara í DNA-próf og sanna að við værum systur. Við vorum í áfalli þegar við fengum niðurstöðurnar og komumst að því að við ættum sitthvorn pabbann,“ segir konan.
„Ég er 31 árs og systir mín er 27 ára. Við töluðum við mömmu sem viðurkenndi að hún hafi átt í sambandi við annan karlmann á svipuðum tíma og hún byrjaði með pabba okkar, eða manninn sem ég kalla pabba. Mamma áttaði sig ekki á því að hinn maðurinn gæti verið líffræðilegur faðir minn.
Hún sagðist ætla að reyna að finna manninn þó svo hún hafi ekki hugmynd um hvar hann sé staddur. Það eru nokkrir mánuðir síðan og hún hefur ekkert sagt við mig. Ég elska pabba og okkur kemur vel saman, en ætti ég að segja honum að hann sé ekki faðir minn? Á ég að halda áfram að láta eins og ekkert hafi gerst eða á ég að tala aftur við mömmu?“
Deidre gefur konunni ráð.
„Ekki segja neitt við pabba þinn, en talaðu við mömmu þína aftur. Hún er kannski að vonast til þess að vandamálið hverfi og að hún þurfi ekki að gera upp fortíðina. Pabbi þinn er pabbi þinn, hann hefur verið til staðar frá því þú fæddist. Það breytir engu þó hann sé ekki líffræðilegur faðir þinn,“ segir hún.