Íslendingar bíða eflaust margir hverjir spenntir eftir Eurovision-kvikmyndinni með gamanleikaranum Will Ferrell í aðalhlutverki.
Ferrell fer þar með hlutverk Íslendingsins Lars Erickssonar í kvikmyndinni, sem er sögð fjalla um eyðimerkurgöngu Íslands í keppninni sem á að hafa staðið í rúma fjóra áratugi. Rachel McAdams leikur konu Lars, Sigrit, að nafni. og fyrrum Bond-leikarinn Pierce Brosnan leikur föður hans, sem í sögunni er sagður vera myndarlegasti maðurinn á Íslandi.
Tökur hafa farið fram undanfarna mánuði, í London, Tel Aviv og hefur bærinn Húsavík verið nefndur sem einn af tökustöðum. Því kemur það fáum á óvart að fjöldi þekktra Íslenskra leikara kemur fram í myndinni. Áður hefur verið greint frá ýmsum þeirra, en hópurinn hefur farið vaxandi samkvæmt bæði IMDb og öðrum heimildum. Einnig birti umboðsstofan Creative Artists Iceland færslu á Facebook þar sem leikarar voru merktir sem eru á vegum stofunnar.
Arnar Jónsson
Arnmundur Ernst Björnsson
Álfrún Rose
Björn Hlynur Haraldsson
Björn Stefánsson
Bríet Kristjánsdóttir
Hannes Óli Ágústsson
Hlynur Þorsteinsson
Jói Jóhannsson
Nína Dögg Filippusdóttir
Ólafur Darri Ólafsson
Smári Gunn
Það eru risarnir hjá Netflix sem framleiða Eurovision-myndina og er þetta fyrsta samstarfsverkefni grínarans við streymiveituna. Ferrell skrifar handritið að myndinni ásamt Andrew Steele en þeir kumpánar hafa reglulega unnið saman síðan á dögum Ferrells hjá grínþættinum Saturday Night Live. Skrifuðu þeir einnig saman kvikmyndina Casa de mi Padre.
Leikstjórinn David Dobkin situr við stjórvölinn en hann á að baki kvikmyndirnar Wedding Crashers, Fred Klaus og Shanghai Knights, svo dæmi séu nefnd.
Streymiveitan hefur ekki gefið upp nákvæma dagsetningu á Eurovision-myndinni en áður hefur verið gefið upp að hún verði gefin út fyrir jól.