Ingibjörg Egilsdóttir, fyrirsæta og fyrrverandi fegurðardrottning, deildi nýverið magnaðri sögu af ömmu sinni í „story“ á Instagram og gaf DV góðfúslegt leyfi til að endurbirta frásögnina.
„Árið er 1959. Esther Garðarsdóttir, móðuramma mín er 24 ára, einstæð móðir á Fáskrúðsfirði sem á þann draum heitast að komast í ljósmæðranám. Námið kostaði meira en hún hafði efni á,“ hefst saga Ingibjargar af ömmu sinni. „Hún frétti af keppni. Fegurðarsamkeppninni Ungfrú Reykjavík sem haldin var fyrir sunnan. Í verðlaun fyrir þá sem bæri sigur úr býtum var: Ferð til útlanda með Úrval Útsýn. Amma var klár, dugleg og mikill töffari. Hún sá tækifæri á þátttöku sinni og skref í átt að sínum draumi um að verða ljósmóðir.“
Eins og Ingibjörg greinir frá ákvað Esther amma hennar að stökkva á þetta tækifæri – hún var nefnilega með plan.
„Amma kom mömmu fyrir í fóstri hjá móður sinni, langömmu minni Guðbjörgu Erlín, og hélt suður til Reykjavíkur til að skrá sig til þátttöku í keppninni. Amma vann keppnina! Amma samdi um að fá heldur peninginn í staðinn fyrir ferðina út með Úrval Útsýn og það gekk eftir. Núna átti hún fyrir Ljósmæðraskólanum. Hún skráir sig í nám við Ljósmæðraskóla Íslands, kláraði það nám og upplifði draum sinn um að fá og að starfa sem ljósmóðir!“
Þess má geta að Esther lést í nóvember árið 2017 og voru þær Ingibjörg afar nánar. Leggur Ingibjörg mikið upp úr því að halda sögu ömmu sinnar á lofti, enda var hún mikil kjarnakona.
Ingibjörg deildi einnig sögu af frændum sínum, sem hefur minna farið fyrir.
„Árið er 1967. Föðurfjölskyldan er búsett í Bandaríkjunum. Fegurðarsamkeppni tvíbura var haldin í Harrisburg, Pennsylvania, USA. Í verðlaun var vegleg peningaupphæð og birgðir af Hershey‘s súkkulaði. Tvíburabræður pabba, Eiríkur og Leifur Ragnarssynir, eru meðal þátttakenda. Þeir eru þá 2 ára gamlir. Þeir unnu keppnina!“ skrifar Ingibjörg og heldur áfram. „Árið er 1968. Tvíburarnir Eiríkur og Leifur Ragnarssynir vinna aftur fegurðarsamkeppni tvíbura! 3 ára dúllutöffarar.“
Það er því mikil hefð fyrir fegurðarsamkeppnum í ætt Ingibjargar. Hún sjálf var í öðru sæti í keppninni Ungfrú Ísland árið 2008 og fulltrúi Íslands í keppninni Ungfrú heimur árið 2009. Næstkomandi laugardag keppir systir hennar, Hugrún Birta Egilsdóttir, í Miss Universe Iceland sem haldin verður í Hljómahöllinni í Keflavík, en Hugrún Birta tók einnig þátt í Ungfrú Ísland árið 2015.
Sjá einnig: Fegurð Egilsdætra vekur heimsathygli: „Tíu árum síðar er komið að litlu systur“
