Aktívistinn og uppljóstrarinn Bára Halldórsdóttir vinnur nú hörðum höndum að því að undirbúa gjörninginn INvalid eða ÖRyrki sem hún verður með á Reykjavík Fringe Festival 1-3. júlí. Gjörningurinn mun felast í því að Bára sjálf verður til sýnis í umhverfi sem fólk sér öryrkja vanalega ekki í, þ.e. ein heima hjá sér. Ein heima hjá sér að takast á við það sem gerir þá að öryrkja.
Á síðu viðburðarins á Facebook birti Bára á föstudaginn myndband þar sem hún gaf fylgjendum innsýn í líf hennar þegar hún er sem verst af verkjum, en hún glímir við ólæknandi ónæmis- og gigtarsjúkdóminn Behcet.
„Það hlaut að koma dagur þar sem ég væri alveg fokked. Nú sit ég á sófanum með símann á statífi því ég get ekki haldið á honum, mér er svo illt í höndunum,“ segir Bára í myndbandinu.“
Hún segist vera á fullu í undirbúningi fyrir gjörninginn og það taki mikið á. Á meðan var Miðflokkurinn að halda málþófi um Þriðja Orkupakkann áfram:
„Simmi og co eru að brillera á þinginu. „Oj helvítis útlendingar og líka helvítis fólk sem er eitthvað að reyna að vera með annað kyn en það fæddist með.“
Þegar Bára verður svona verkjuð þá þarf hún mikla aðstoð.
„Þannig að konan mín er núna í einkahjúkrunarstöðu. „Geturðu rétt mér þetta, geturðu rétt mér hitt. Geturðu sett mig í tölvuna, geturðu sagt mér að ég sé ekki að deyja.“
„Ég er búin að taka öll verkjalyf í heimi, gera ógeðslega mikið og vera ótrúlega dugleg. Finnst það samt ekki.“
Þegar Bára verður svona verkjuð þá á hún það til að detta í sjálfsvorkunnarham. Þá sé langbest að reyna bara að vinna sig í gegnum það.
„Þetta reddast, er það ekki íslensku stíllinn? “
Hér fyrir neðan má sjá myndbandið og Facebook-síðu gjörningsins INvalid/ÖRyrki má finna hér