Óskarsverðlaunaleikarinn Cuba Gooding Jr. hefur verið sakaður um að áreita konu kynferðislega á bar á Manhattan í New York á sunnudagskvöld. Huffington Post segir frá.
Að sögn lögreglunnar greip leikarinn í brjóst konunnar og í kjölfarið fóru þau að rífast. Öryggisverðir skárust þá í leikinn en atvikið á að hafa átt sér stað um klukkan níu í gærkvöldi á barnum Magic Hour. Konan hringdi í neyðarlínuna síðar um kvöldið og tilkynnti það sem átti sér stað.
Blaðamaður Huffington Post hefur ekki fengið svör frá talsmanni leikarans vegna atviksins, en þetta er ekki í fyrsta sinn sem hann er kærður um kynferðislega áreitni. Kona á bar í Nýju-Mexíkó sakaði hann um svipað athæfi árið 2012 en þá sagði leikarinn ásakanirnar vera þvætting.
