Líkt og Alþjóð veit keppir Hatari í úrslitum Eurovision í kvöld fyrir Íslands hönd. DV af viðtali við fararstjóra íslenska hópsins, Felix Bergsson, sem virðist afar bjartsýnn fyrir kvöldið.
„Við erum rosa glöð og það er gríðarleg jákvæðni gagnvart Hatara,“ segir Felix og bætir við að öll heimspressan sé á eftir Hatara.
„Þetta er eitthvað sem við höfum ekki séð í mjög langan tíma eða bara nokkurn tíma. Þau eru búin að fara í alla heimspressuna sem hefur aldrei gerst áður hjá Íslandi í Eurovision,“
„CNN, BBC, HBO og hvað sem þetta heitir nú allt saman, allir vilja hitta Hatara og við erum að ýta stórum fjölmiðlum frá okkur, vegna þess að við höfum ekki tíma. Þau eru búin að koma ákveðnum málum á dagskrá sem þau vildu koma á dagskrá og það hefur gengið gríðarlega vel. Mér þykir athyglisvert að sjá umræðuna hérna heima um að það hafi ekki tekist, því það er bara alrangt,“
segir Felix:
„Eurovision er með ákveðnar reglur varðandi pólitík og við höfum bara reynt að fylgja þeim, en það er hins vegar engin spurning að málefnin sem Hatari vildi koma í umræðuna komust í umræðuna einfaldlega vegna þess að Hatari setti þau á dagskrá. Það hefur miklu meira verið rætt um ástandið hér í Ísrael vegna þess að Hatari er með.“
Felix skorar líka á gagnrýnendur:
„Reyni þeir sem gagnrýna að fá viðtöl við stærstu fjölmiðla heims til að ræða þessi málefni, verði þeim að því, þeir fá það ekki, á meðan Hatara tókst það.“
Felix segist afar bjartsýnn fyrir kvöldið: „Þau hafa bara staðið sig gríðarlega vel og nú er bara aða landa þessu í kvöld og reyna að fara alla leið í þessu.“
Felix viðurkennir að hollenska lagið sé líklegast til sigurs en segir að ef einhver önnur þjóð sé að fara að sigra þá sé það Ísland.
Felix spyr sig líka hvers vegna stærstu útgáfufyrirtæki heims séu ekki búin að hafa samband við Hatara og segir „Hatari mun sigra heiminn: „Það er gríðarlegur áhugi á þeim sem listaháopi og þau eru rétt að byrja.“
