Dómararennsli fyrir fyrri undanriðilinn í Eurovision fór fram í kvöld og Ísland var meðal landanna sem fluttu framlög sín. Mikilvægt kvöld, enda gáfu alþjóðlegar dómnefndir lögunum stig í kvöld á meðan að áhorfendur heima í stofu kjósa annað kvöld.
Wiwibloggs, stærsta óháða Eurovision-fréttastofa í heimi, er búin að birta myndband á YouTube þar sem farið er yfir dómararennslið. Spekingarnir Angus Quinn, William Lee Adams, Deban Aderemi og Chris Halpin velja þau þrjú lög sem þeir telja vera best.
Angus, William og Deban setja Hatara allir í annað sæti í þessum riðli eftir rennslið.
„Þessi kinkí hljómsveit frá Íslandi er búin að stela hjarta mínu og höfði,“ segir Angus í meðfylgjandi myndbandi. „Öskur hefur aldrei hljómað svo fagurt á Eurovision-sviðinu,“ bætir hann við. „Það er enginn vafi á því að Ísland kemst í úrslit eftir alltof langan tíma í auðninni.“
William er sammála.
„Þorið að dreyma. Þorið að vera í kloflausum buxum – það er það sem Hatari gerir. Þeir eru með alvarleg skilaboð vafin í gerviefni og leður. Þegar maður svitnar í gerviefni kemur vond lykt en þetta lyktar svo vel,“ segir hann. „Þetta er kinkí með tilgangi.“
Deban segir atriðið hafa verið einstaklega vel heppnað og að það hafi komið honum á óvart þó hann hafi séð það margoft. Chris gengur einu skrefi lengra en félagar sínir og segir Hatara hafa unnið fyrri undanriðilinn að sínu mati.
„Ég held að mjaðmahnykkir Klemensar hafi sannfært mig að lokum. Það var svo kynþokkafullt,“ segir hann. „Atriðið er mjög fínpússað núna.“
