Söngkonan Sara Pétursdóttir, betur þekkt sem Glowie, var í viðtali við Stylist sem birtist á vef þeirra fyrr í dag.
Glowie er 22 ára og hefur slegið í gegn undanfarin ár, bæði hér á landi og utan landsteina.
Hún hefur opnað sig um einelti og kynferðisofbeldi sem hún hefur orðið fyrir. Hún samdi lögin Body og Cruel til að hjálpa fólki að ganga í gegnum svipaða hluti.
Glowie segir að fyrsta skipti sem hún kom fram á sviði hafi verið á skólaviðburði. „Ég var 10 eða 11 ára. Ég söng íslenskt lag sem var um að vera öðruvísi, en þannig leið mér í skólanum. Þetta var stórt skref fyrir mig að standa á þessu sviði, fyrir framan alla bekkjarfélaga mína sem lögðu mig í einelti á hverjum degi, og syngja af lífskröftum. Ég var rosalega stressuð en meira að segja þá vissi ég að söngur væri mín fyrsta ást, og það sem ég hef mesta ástríðu fyrir. Þetta var risastórt augnablik fyrir mig,“ segir hún við Stylist.
Glowie var að gefa út tónlistarmyndband við lagið Unlovable. Horfðu á það hér að neðan.
Þú getur lesið viðtalið við Glowie í heild sinni hér.