Páll Winkel, forstjóri Fangelsismálastofnunar, skýrir frá því viðtali við Morgunblaðið í dag að hann fái reglulega hótanir frá mönnum úti í bæ:
„Ég fer mjög varlega og fjölskylda mín einnig. Ég og aðrir starfsmenn hér verðum reglulega fyrir hótunum og áreitni úti í bæ en maður lagar sig að því og ég tek það ekki inn á mig. Það er kannski skondið þegar maður er farinn að flokka hótanirnar í frumlegar og ófrumlegar.“
Páll segir síðan að frumlegur maður hafi hringt í hann um daginn og flutt honum eftirfarandi skilaboð:
„Ef það er eitthvert réttlæti í heiminum færð þú krabbamein og deyrð.“
Páll skýrir jafnframt frá því að einu sinni hafi maður komist heim til hans. Hins vegar treystir hann lögreglunni til að vernda sig en segir að hann og fjölskylda sín fari varlega. Páll er í sambúð með hinni þekktu blaðakonu Mörtu Maríu Jónasdóttur.
Páll vill fjölga mjög rýmum í opnu fangelsi á Íslandi og segir að enginn betrist af því einu að vera lokaður inni. Hann trúir á það góða í manninum:
„Já. Það er til vont fólk. Það hefur fólk farið hér í gegnum kerfið sem ég hef trú á að verði brotamenn alla tíð. En það eru algjörar undantekningar. Ég hef trú á að flestir geti betrast, og fái þeir hlýju og væntumþykju og finni að öllum sé ekki sama um þá, þá geti þeir komist á fætur. Það er virkilega skemmtilegt að rekast á einstaklinga sem voru lengi inni í fangelsi og ítrekað, sem eru svo allt í einu bara í röðinni með þér á Serrano; eru að koma úr vinnunni og í fínum gír.“
Páll segir að slíkir einstaklingar heilsi sér og hann fái líka annað slagið bréf frá fyrrverandi föngum sem segi að allt gangi vel frá sér.
Páll segir að eitt það erfiðasta við starf fangelsismálastjóra sé að taka starfið ekki heim með sér. Þetta sé myrkur heimur og oft fjallað um ljót mál. Erfitt sé að kúpla sig út úr vinnunni en æskilegt.