Magnús Ver Magnússon, einn sigursælasti kraftajötun sögunnar, segir frá nokkuð gamansömu atviki sem hann lenti í um helgina á Facebook-síðu sinni. Hann segist hafa verið stöðvaður skyndilega af lögreglu og viðurkennir fúslega að hann hafi verið fullharður fyrir lögreglumanninn.
„Ég var òvænt á ferðinni síðastliðna nótt á bíl og sá mikið af blikkandi bláum ljósum hér og þar um stór höfuðborgarsvæðið! Ég passaði vel upp á að vera á löglegum hraða með beltið spennt til að gefa þeim enga ástæðu til að stöðva för mína. En allt kom fyrir ekki! Allt í einu eru blikkljósin framundan og þeir að ræða þar við bílstjóra! Ég ætlaði nú bara að keyra í rólegheitunum framhjá þá veifa þeir mér að stoppa,“ lýsir Magnús
Hann segist ekki hafa verið spenntur yfir þessu, enda á leið heim þreyttur. „Ég varð nú ekkert kátur með þetta og spurði hvern andskotann þeir væru að stoppa mig fyrir því ég vissi nákvæmlega að ekkert hafði ég gert rangt. „Ehhh blása,“ segir gaurinn og sýnir mér einhverja græju.
Magnús samþykkti þetta og bað um apparatið. „„Já komdu með þetta,“ segi ég og ætla að grípa græjuna af honum og blása þakið af henni. Þá nei nei það má ekki. Hann þarf að halda á þessu. Æi ég var kannski aðeins of pirraður við greyjið en var á leið heim frekar þreyttur,“ segir Magnús.