Þegar Björk var 15 ára fór hún að heiman, staðráðin í að móta sitt eigið sjálfstæða líf. Tónlistin var hennar ástríða en hún þurfti nú samt að finna sér vinnu til að halda sér uppi. Hún tók að sér verkefni í fiskvinnslu, gosverksmiðju og síðan í plötubúð.
Á unglingsárum gerðist hún meðlimur í hljómsveitinni Kukl. Eftir að hafa ferðast um Evrópu með Kukl allt sumarið snéru þau aftur til Reykjavíkur veturinn 1986.
Fljótlega eftir það var Björk handtekin í fyrsta sinn. Björk gisti eina nótt í fangaklefa eftir að hafa brotið rúðu á skemmtistað af þeirri ástæðu að staðurinn var „fullur af leiðinlegu fólki“.
„Við vorum í eins konar leiðangri, ég býst við að við höfum verið að reyna að breyta heiminum.“
sagði Björk í viðtali við Hot Press árið 1994.
„Við eyddum miklum tíma á lögreglustöðinni. Við áttum þessi löngu samtöl með lögregluþjónunum, reyndum að opna augun þeirra. Í lok dagsins var þetta bara fyndið. Við höfðum gaman að því að pirra þá.“
Blaðamaður Hot Press segir að í gegnum viðtalið hafi Björk verið barnaleg í fasi, eins og barn í gervi fullorðinnar manneskju. Hún gat verið að segja eitthvað fullkomlega fullorðinslegt og skynsamlegt en fas hennar gróf undan trúverðugleikanum.
„Mér finnst gaman að vera kjánaleg, það er besta leiðin fyrir mig til að vera til. Ég kýs lélega brandara yfir þá góðu, því lélegri sem þeir eru því betri eru þeir.“
Blaðamaðurinn lýsir síðan útliti Bjarkar máli sínu til stuðnings.
„Svipbrigði hennar minna á eilíf vonrbrigði en maður veit aldrei hvort hún er að fara að bresta i hlátur eða grátur.“
Hún hafði líka athygli á við aldraðan gullfisk, segir blaðamaðurinn. Hann segir frá því þegar þau voru trufluð er einhver kom með jurtate inn í herbergið.
„Björk virðist alveg gleyma því að ég sé á staðnum. Hún tekur upp minnisbókina mína og fer að fletta í gegnum hana. Síðan byrjar hún líka að fikta í upptökuvélinni minni.“
Blaðamaðurinn hélt áfram að segja frá þessu og fer að tala um kæki Bjarkar:
„Hendurnar hennar voru á stöðugri ferð um líkamann hennar. Það minnti helst á fangelsisvörð sem leitar á líkama fanga eftir að neyðarbjallan fer í gang.“
Blaðamaðurinn sagði að það væri líkt og Björk væri nýbúin að fá líkama í fyrsta skipti og væri ekki viss um hvort hann passaði eða ekki.
„Nefið, hnén og axlirnar voru helstu svæðin sem hún snerti en það var ekki snefill af líkamanum sem hendurnar slepptu því að heimsækja með klóri, poti, togi eða jafnvel með samsetningi af öllu þrennu í einu.“