Söngvarinn John Legend hélt upp á fertugsafmælið með stæl nýlega. Eins og venja er í afmælum var gestum boðið að láta mynda sig í svokölluðum „photo booth,“ sem var ekkert slor: rúllettuborð með spilapeningum og seðlum, kristalsljósakróna og flottheit.
Eiginkonan og fyrirsætan Chrissy Teigen var að sjálfsögðu mætt, auk hjónanna Kim Kardashian og Kanye West, sú fyrrnefnda mætti í gegnsæjum heilgalla og stillti sér upp á rúllettuborðið fyrir myndatökur.
Systir hennar Kourtney lét líka sjá sig og smellti í myndatöku með vindil og tvo myndarlega karlmenn sér við hlið.
Legend og West virðast hafa grafið stríðsöxina, en rifrildi þeirra á milli komst í fréttirnar í fyrra þegar Legend gagnrýndi West fyrir umdeild stjórnmálaleg ummæli hans. Birti West meðal annars einkaskilaboð þeirra opinberlega.
