Áður hafði verið skipulagt að Garcia kæmi ásamt Sam Healey en hann komst ekki vegna persónulegra ástæðna. Vasel, Garcia og Healey eru þekktastir fyrir Topp 10 listana sína sem þeir gera saman og dýnamíkin milli þeirra þykir einstök. Þeir ferðast um allan heim og taka þátt í ráðstefnum og stundum taka þeir upp topplista á vettvangi. Forvitnilegt verður að vita hvort þeir taki upp á því í Laugardalshöllinni.
Meðal annarra gesta sem mæta á ráðstefnuna má nefna Jeremy Bulloch sem lék Boba Fett í Star Wars myndinni The Empire Strikes Back og raddleikarinn Nick Jameson, sem meðal annars hefur talað inn á Sam og Max tölvuleikina.
Vasel er guðfræðingur og fyrrum stærðfræðikennari sem býr og starfar í Homestead í Flórída fylki. Árlega heldur hann eigin borðspilaráðstefnu í Orlando, gefur út spil og veitir verðlaun. Vasel stofnaði The Dice Tower sem bloggsíðu og hlaðvarp árið 2005 og um tíma var hann starfandi í Suður Kóreu. Fyrirtækið óx umtalsvert ár frá ári, sérstaklega eftir að hann hóf útsendingar á Youtube og nú er síðan sú stærsta og virtasta í heimi.
Vasel tilkynnti að hann kæmi til landsins í Spurt og svarað myndbandi sem sent var út í gær, sunnudag. Væntanlega mun hann ávarpa gesti og grípa í nokkur spil við ráðstefnugesti.
