Ungfrú Heimur fer fram í Sanye í Kína þann 8. desember, en það er Erla Alexandra Ólafsdóttir sem er fulltrúi Íslands í keppninni.
Erla Alexandra er 24 ára Kópavogsbúi, stundar nám við lögfræði í HR og hefur meðal annars unnið við sjálfboðastörf með börnum í Afríku. Erla Alexandra er svo sannarlega með gott fólk að baki sér í undirbúningnum fyrir keppnina: Linda Pétursdóttir sem var valin Ungfrú Reykjavík, Ísland og Heimur árið 1988 valdi Erlu Alexöndru sem fulltrúa keppninnar í ár, en Linda tók í október við stjórn Miss World á Íslandi. Heiðar Jónsson snyrtir veitti Erlu Alexöndru ómetanleg ráð, en hann er öllum hnútum kunnugur þegar kemur að fegurðarsamkeppnum og síðast, en ekki síst, hefur móðir Erlu Alexöndru, Guðrún Möller, tvímælalaust getað gefið henni góð ráð úr heimi fegurðarsamkeppna, en Guðrún var Ungfrú Ísland 1982 og tók þátt í Miss World sama ár.
Aðaláhersla starfsemi Miss World hefur verið góðgerðarstörf og hafa samtökin Beauty with a purpose sem Julia Morley eigandi Miss World stofnaði árið 1972, safnað yfir 1 milljarði sterlingspunda og styrkt bágstödd börn um allan heim.
118 stúlkur keppa um titilinn og gefa netverjar aðstoðað við valið. Á heimasíðu Miss World er hægt að kjósa Erlu Alexöndru áfram og geta netverjar kosið út föstudag, en keppnin fer eins og áður segir fram á laugardag.
