Jólauglýsing bresku verslunarkeðjunnar Iceland, sem gerð var í samstarfs við Greenpeace samtökin, hefur verið bönnuð fyrir að vera of pólitísk. Í henni er fylgst með órangútan og eyðileggingu regnskóga af völdum pálmaolíuframleiðanda.

Auglýsingasamtökin Clearcast í Bretlandi, töldu auglýsinguna stangast á við lög sem banna pólitísk skilaboð í auglýsingum, en fyrr á þessu ári var Iceland fyrsta verslunarkeðjan í Bretlandi sem bannaði pálmaolíu úr sínum eigin vörum.

Breska leikkonan Emma Thompson talsetur auglýsinguna sem er ansi áhrifarík.

„Við teljum söguna vera merkilega sögu sem þarf að heyrast,“ segir Malcolm Walker stofnandi Iceland. „Við vissum að það væri möguleiki á því að þetta myndi gerast en við reyndum okkar besta.“