Frá því að nýtt greiðslukerfi Strætó, Klappið, var tekið í notkun fyrir rúmlega ári síðan hafa verið virkjaðir hátt í hálf milljón aðganga og daglegar skannanir hlaupa á tugum þúsunda. Virkjaðir notendaaðgangar sem eru opnir í Klapp kerfinu í dag eru 473.888 talsins miðað við tölur teknar saman þann 6. febrúar síðastliðinn eins og segir í tilkynningu frá Strætó.

Frá því að kerfið var tekið í notkun, 16. nóvember 2021, hefur 63.541notendaaðgöngum verið eytt, þar sem um var að ræða til dæmis tvöfaldar skráningar eða nafnlausa eða auðkennda aðganga sem eytt var eftir notkun.

Stóðst kostnaðaráætlun

Ákveðið var að ráðast í gerð nýs greiðslukerfis með FARA sem er alþjóðlegt fyrirtæki sem hefur reynslu af því að setja upp samskonar greiðslukerfi fyrir fyrirtæki í almenningssamgöngum. Í byrjun komu fram ákveðnir hnökrar sem þurfti að bregðast við, en kerfið er í stöðugri þróun þar sem þarfir viðskiptavina Strætó eru ávallt settir í forgang og framundan eru margar nýjungar og uppfærslur í kerfinu sem spennandi verður að segja frá á komandi mánuðum. Samkvæmt tilkynningunni stenst verkefnið upphaflega kostnaðaráætlun en farið var í útboð skv. opinberum kaupum á EES svæðinu.

Kerfið legið niðri sex sinnum

Kerfið hefur legið niðri sex sinnum síðastliðna sex mánuði og bilunin varað frá tæpum 30 mínútum til tveggja klukkutíma. Undantekningin frá þessu var 18. október sl. þegar viðskiptavinir gátu ekki keypt nýjar vörur en það stóð yfir í rúmlega tíu klukkustundir sem skýrist af því að nóttin var þar inn í. Uppitími er þrátt fyrir það afar góður, eða yfir 99.99%.

Hlutfall erlendrar kortaveltu af heildarkortaveltu í Klapp kerfinu er hæst yfir sumarmánuðina en í hverjum mánuði er erlend kortavelta að meðaltali um 13% af heildarkortaveltu