fbpx
Þriðjudagur 05.mars 2024
EyjanFastir pennar

Svarthöfði skrifar: Hugumprýði, fórnfýsi og örlæti

Svarthöfði
Fimmtudaginn 7. desember 2023 13:00

Ekki missa af Helstu tíðindum dagsins í pósthólfið þitt

Lesa nánar

Svarthöfði hugsar með þakklæti til þeirra fjölmörgu sem leggja á sig mikið erfiði og jafnvel áþján, færa fórnir, í þágu fjöldans og leggja sitt af mörkum til að bjarga heiminum. Já, bjarga heiminum, því það er nákvæmlega það sem nú á sér stað í Sameinuðu arabísku furstadæmunum, þar sem 80 þúsund af færasta og fórnfúsasta fólki veraldar kemur saman á tveggja vikna langri ráðstefnu, COP28, með ekki minna verkefni en að bjarga jarðarbúum frá því að tortíma sjálfri jörðinni.

Sér í lagi er Svarthöfði þakklátur hinum rúmlega 80 einstaklingum sem lögðu land undir fót alla leið héðan frá Íslandi til að funda við erfiðar aðstæður fjarri landi íss og elda, fjarri ástvinum og fjölskyldu. Já, mikið er á sig lagt í þágu almannahagsmuna. Að halda því fram að fórnfýsin ríði ekki við einteyming í þessum fríða hópi flokkast vart undir ýkjur.

Og fríður er hópurinn. Hvorki meira né minna en tveir ráðherrar, forsætis- og umhverfis-, og verður það að teljast stórhuga af hálfu ríkisstjórnar sem telur einungis tólf ráðherra að senda heila tvo. Mikið mæðir þá á hinum tíu sem heima sitja. Fleiri færa fórnir en aðeins þeir sem fórnuðu sér í langferðina.

Ráðuneytin og opinberar stofnanir eru áberandi í 80 manna hópnum sem sigldi, aðstoðarmenn ráðherra, upplýsingafulltrúar, þingmenn, borgarstjóri og fleiri og fleiri sem vitaskuld eru algerlega ómissandi þegar forða þarf heiminum af bjargbrún loftslagsvár.

Stórhugur og örlæti íslenskra stjórnvalda, þegar kemur að loftslagsmálum, er að mati Svarthöfða hafið yfir allan eðlilegan vafa. Á COP28 reis sjálfur forsætisráðherra lýðveldisins úr sæti, kvaddi sér hljóðs og tilkynnti öllum viðstöddum að Ísland myndi ekki láta sitt eftir liggja þegar að því kemur að bjarga heiminum. Árlega mun Ísland greiða 80 milljónir íslenskra króna í beinhörðum peningum inn í sjóð sem ætlað er að sigrast á loftslagsvánni.

Til að setja hlutina í samhengi má ætla að þessi fjárhæð slagi hátt upp í kostnaðinn við að senda hina glæsilegu 80 manna sendinefnd á COP28 fundinn. Hér er því ekki um neina smápeninga að ræða. Fyrir þessa fjárhæð mætti kaupa þriggja herbergja íbúð í Reykjavík, þó ekki á þéttingarreit.

Svarthöfði átelur þá sem hreyta háðsyrðum í og atyrða ríkisstjórnina fyrir aðgerðaleysi í öllum málum. Ofangreint sýnir og sannar að ríkisstjórnin er hugdjörf og hikar ekki við að taka stórar ákvarðanir. Annað dæmi um áræði og hugrekki er að ekki vafðist eitt andartak fyrir ríkisstjórninni og foringjum hennar að verja tveimur milljörðum króna til að koma tólfta ráðherrastólnum fyrir við ríkisstjórnarborðið þegar stjórnin var mynduð.

Svarthöfði getur ekki á sér heilum tekið yfir kaldhæðni og kaldlyndi þeirra sem reyna að gera lítið úr ríkisstjórninni og öðrum þeim sem leggja á sig ómælt erfiði fyrir okkur hin. Gleymum því ekki að stór hluti hópsins frækna er enn að störfum fyrir okkur og framtíðina við hryllilegar aðstæður í Sameinuðu arabísku furstadæmunum. Hugsum til þeirra.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Pennar

Mest lesið

Nýlegt

EyjanFastir pennar
Fyrir 2 vikum

Steingerður Steinarsdóttir skrifar: Broskarl úr bankanum

Steingerður Steinarsdóttir skrifar: Broskarl úr bankanum
EyjanFastir pennar
Fyrir 2 vikum

Björn Jón skrifar: Trúin — menningin — móðurmálið  

Björn Jón skrifar: Trúin — menningin — móðurmálið  
EyjanFastir pennar
Fyrir 2 vikum

Sigmundur Ernir skrifar: Maðurinn sem varð að snúa aftur

Sigmundur Ernir skrifar: Maðurinn sem varð að snúa aftur
EyjanFastir pennar
Fyrir 2 vikum

Þorsteinn Pálsson skrifar: Afleiðing veltuhraða á ráðherrastóli

Þorsteinn Pálsson skrifar: Afleiðing veltuhraða á ráðherrastóli
EyjanFastir pennar
Fyrir 2 vikum

Svarthöfði skrifar: Morgunblaðsfrumvarpið fæðist

Svarthöfði skrifar: Morgunblaðsfrumvarpið fæðist
EyjanFastir pennar
Fyrir 3 vikum

Þorsteinn Pálsson skrifar: Uppreisn og samtal

Þorsteinn Pálsson skrifar: Uppreisn og samtal
EyjanFastir pennar
04.02.2024

Björn Jón skrifar: Horft á heiminn í spegli

Björn Jón skrifar: Horft á heiminn í spegli
EyjanFastir pennar
30.01.2024

Svarthöfði skrifar: Er glæsihýsi þingmanna mislukkað?

Svarthöfði skrifar: Er glæsihýsi þingmanna mislukkað?
EyjanFastir pennar
28.01.2024

Björn Jón skrifar: Forseti á að vera lífsreyndur 

Björn Jón skrifar: Forseti á að vera lífsreyndur