Gestir og gangandi á Laugavegi eiga von á góðu á morgun þegar sælgætisgerðin Freyja slær upp veislu í nýrri Pop-up verslun sinni á Laugavegi milli kl. 15 og 17, í tilefni af stórafmæli. Þar verður meðal annars gefið smakk.

Sælgætisgerðin Freyja fagnar um þessar mundir 105 ára afmæli sem gerir Freyju að elstu starfandi sælgætisgerð á Íslandi. „Við hjá Freyju erum afar þakklát Íslendingum fyrir viðskiptin síðustu 105 árin, við ætlum í áframhaldandi sókn innanlands og utan og viljum því bjóða öllum að koma við í Pop-up verslun okkar á Laugavegi 56 þar sem við munum bjóðum upp á smakkupplifun á klassísku nammi frá Freyju“, segir Pétur Thor, framkvæmdastjóri Freyju.

Þeir sem kjósa að svara stuttri könnun fá smakkið endurgjaldslaust, en ólögráða einstaklingar undir 18 ára verða að vera í fylgd með forráðamanni. Einungis forráðamenn svara könnun en öll fjölskyldan fær að taka þátt í smakkinu. Einnig er hægt að greiða 400 kr. vilji fólk einungis fara í smakkupplifunina sem er sambland af vörunýjungum sem gætu verið væntanlegar á markað ásamt öðru klassísku góðgæti frá Freyju. „Markmið okkar með könnuninni er að geta boðið viðskiptavinum okkar upp á nýtt og spennandi sælgæti sem hrífur bragðlauka þeirra,“ segir Pétur Thor.

Fimmtudaginn 13. júlí verður haldið upp á 105 ára afmæli Freyju í pop-up versluninni þar sem gestum og gangandi er boðið að koma og smakka nýtt gómsætt Freyju nammi og snúa lukkuhjóli, auk þess sem andlitsmálning verður í boði fyrir börnin. Verslunin opnar formlega daginn eftir, föstudaginn 14. júlí, og hefst þá smakkupplifun Freyju, sem verður ekki í boði í afmælinu.

„Í Pop-up verslun Freyju ætlum við að vera með hugmyndasamkeppni sem allir geta tekið þátt í, vöruþróunarteymi Freyju mun að lokum kjósa eina hugmynd sem fer í framleiðslu og mun vinningshafi hljóta vegleg verðlaun. Við viljum bjóða öll hjartanlega velkomin að gleðjast með okkur á 105 ára afmæli Freyju“, segir Pétur Thor að lokum.