Ólafur Arnarson, blaðamaður á Fréttablaðinu, segir íslensku krónuna vera fílinn í stofunni og löngu sé tímabært að Ísland gangi í Evrópusambandið. Þetta kemur fram í leiðara Fréttablaðsins í dag. „Líkast til er það ein­hver land­læg þrjóska sem veldur því að ís­lenskir ráða­menn berja hausnum við steininn og vilja standa utan stærsta og á­hrifa­mesta lýð­ræðis­banda­lags í heimi þar sem fyrir eru vina- og frænd­þjóðir okkar. Í gegnum EES höfum við skuld­bundið okkur til að lög­leiða mest­allt reglu­verk ESB, en þar sem við erum ekki aðilar að ESB höfum við engin á­hrif á stefnu­mótun sam­bandsins,“ segir Ólafur.

Hann bendir síðan á kostina við aðild: „Með fullri aðild að ESB fengjum við Ís­lendingar ekki einungis sæti við borðið þar sem stefna sam­bandsins er mörkuð og á­kvarðanir teknar. Við fengjum einnig evruna, gjald­miðil ESB.“

Ólafur fer síðan yfir nokkra ókosti þess að halda í krónuna sem gjaldmiðil. Innflutningsfyrirtæki þurfi að kaupa gjaldeyri af bönkunum til að kaupa inn vörur og greiða bönkunum þóknun. Þetta leggist á vöruverðið og neytendur borgi brúsann. Hann segir ennfremur:

„Ís­lensk út­flutnings­fyrir­tæki þurfa að selja bönkunum gjald­eyri fyrir krónur til að geta borgað laun og að­föng hér á landi. Fyrir þetta borga þau bönkunum þóknun. Þetta dregur úr sam­keppnis­hæfni ís­lenskra fyrir­tækja á er­lendum mörkuðum.“

Ólafur bendir á að íslenska krónan sé minnsti gjaldmiðill í heimi og augljóst er að hann telur þennan gjaldmiðil standa samfélaginu helst fyrir þrifum í efnahagsmálum:

„Ís­land er gjöfult og gott land. Akkilesar­hæll Ís­lands er krónan, minnsti gjald­miðill í heimi. Ís­lenska krónan skaðar sam­keppnis­hæfni Ís­lands gagn­vart um­heiminum.“