Kolbeinn Óttarsson Proppé, þingmaður vinstri grænna virðist hafa fengið undarlega sendingu inn um bréfalúguna sína áðan. Frá því greinir hann á Facebook-síðu sinni. Það gerðist eftir að frumvarp um afglæpavæðingu vörslu fíkniefna var hafnað. Kolbeinn var einn þeirra sem kaus gegn frumvarpinu og virðist einhver hafa verið ósáttur með það og því sent honum nokkra litla poka sem innihéldu hvítt duft.

Kolbeinn virðist lýta á sendinguna sem einskonar mótmæli vegna atkvæðis síns. Hann segir að betri leiðir séu til að koma skoðunum sínum á framfæri, en svona sé pólitík dagsins í dag orðin. Hann segir þó að líklega sé ekki um fíkniefni að ræða, heldur „lyftiduft eða eitthvað álíka“

„Þetta beið mín þegar ég kom heim áðan af fundum. Ég verð að segja að ég hef fengið betri sendingar og vildi óska þess að fólk tjáði sig öðruvísi en á þennan hátt. En hingað erum við komin í pólitíkinni, það er einhvern veginn allt leyfilegt. Ég hygg að þetta sé nú bara lyftiduft eða eitthvað álíka, en ég held að það séu betri leiðir til að eiga skoðanaskipti en að setja hvítt duft í pokum inn um bréfalúgur.“

Umrætt frumvarp var lagt fram af Pírötum. Hefði það gengið í gegn hefðu refsingar við vörslu fíkniefna sem ætluð væru til eigin nota verið afnumin. Stjórnarflokkarnir ásamt Miðflokknum kusu gegn frumvarpinu. Aðrir stjórnarandstöðuflokkar kusu með. Dómsmálaráðherra, ásamt forsætisráðherra og sjávarútvegsráðherra sátu hjá í atkvæðagreiðslunni.

Myndina af pokunum með duftinu sem Kolbeinn birti á Facebook má sjá hér að neðan.