Ásmundur Einar Daðason fyrrum þingmaður og ráðherra Framsóknarflokksins hefur ekki tjáð sig mikið opinberlega um stjórnmál eftir að hann féll af þingi í kosningunum í nóvember. Fyrr í dag gerði hann þó breytingu á því en ekki til að gagnrýna pólitíska andstæðinga sína í núverandi ríkisstjórn eins og kannski búast hefði mátt við heldur til að hrósa þeim og þá sérstaklega arftaka sínum í embætti mennta- og barnamálaráðherra Ásthildi Lóu Þórsdóttur.
Þetta gerir Ásmundur Einar í Facebook-færslu en tilefni hennar er samningur ríksins og Sambands íslenskra sveitarfélaga um að ríkið muni verja þremur milljörðum króna í málefni barna með fjölþættan vanda og taka alfarið við, af sveitarfélögunum, framkvæmd og ábyrgð á fjármögnun sérhæfðrar þjónustu við slík börn sem búsett eru utan heimilis.
Ásmundur Einar hrósar ríkisstjórninni fyrir samninginn og segir um að ræða mikilvægan áfanga í málefnum barna. Hann segist hafa hitt Ásthildi Lóu á fundi síðastliðinn föstudag en hún hafi þá greint honum frá efni samningsins í trúnaði áður en greint var frá honum opinberlega:
„Var alveg ótrúlega glaður að heyra þessar fréttir enda er þetta gríðarlega mikilvægur áfangi í málefnum barna á Íslandi sem við sem samfélag hefðum átt að klára fyrir löngu.“
Ásmundur Einar lofar alla samningsaðila í hástert og hrósar Ásthildi Lóu sérstaklega fyrir hennar störf í ráðuneytinu sem hann stýrði á undan henni:
„Má til með að óska öllum þeim sem að þessu hafa komið innilega til hamingju. Það er vel gert að þetta sé eitt af fyrstu stóru málum ríkisstjórnarinnar í málefnum barna. Mér finnst nýr ráðherra fara vel af stað og það er mikilvægt að loknum þessum áfanga fái hún fullan stuðning við að framfylgja þessu verkefni á næstu misserum.“
Hann hrósar einnig öðrum ráðherrum ríkisstjórnarinnar fyrir þeirra aðkomu að málefnum barna:
„Hef fulla trú á að við getum verið bjartsýn í því efni vegna þess að svo virðist sem forystufólk ríkisstjórnarinnar auk fjármálaráðherra séu að leggja ríka áherslu á að forgangsraða í þágu barna og ungmenna. Kraftmikil yfirlýsing forsætisráðherra af þessu tilefni undirstrikar sterkt þá áherslu.“
Það hefur löngum þótt eðlilegt í stjórnmálum að gagnrýna pólitíska andstæðinga sína og hrósa þeim helst aldrei sama hvað á gengur, jafnvel þótt maður sé ekki lengur þingmaður eða ráðherra, en Ásmundur Einar ætlar greinilega ekki að fylgja þeirri venju:
„Ríkisstjórnin á hrós skilið fyrir þennan áfanga og mér finnst við eiga að viðurkenna og segja það þegar vel er gert. Þau er að fara vel af stað í þessum málum. Til hamingju og áfram gakk!“
