Tónlistarmaðurinn Gunnar Þórðarson er áttræður í dag. Afmælinu er fagnað með heiðurstónleikum í Hörpu.

Gunnar er fæddur 4. janúar árið 1945. Upprunalega er hann Strandamaður en flutti ungur til Keflavíkur og þar varð hann landsþekktur tónlistarmaður, fyrst með hljómsveit Guðmundar Ingólfssonar og síðar með hljómsveitunum Hljómum og Trúbroti.

Gunnar hefur samið ógrynni laga á löngum ferli. Á meðal þekktra laga eftir Gunnar má nefna „Bláu augun þín“, „Þú og ég“, „Þitt fyrsta bros“, „Norðurljós“, „Vetrarsól“, „Gaggó Vest“ og „Ég veit þú kemur“.

Gunnar fær afmælisóskir í dag, meðal annars frá fjölmiðlamanninum Agli Helgasyni. „Ég óska vini mínum, hinum einstaka tónsnillingi Gunnari Þórðarsyni, til hamingju með áttræðisafmælið í dag. Takk fyrir alla dásamlegu músíkina og kynni góð,“ segir Egill á samfélagsmiðlum.

Þá eru haldnir heiðurstónleikar í Eldborgarsal Hörpu klukkan 16:00 í dag. Landslið söngvara og tónlistarmanna er kallað til. Flytjendur eru Pálmi Gunnarsson, Páll Óskar, Sigríður Beinteinsdóttir, Zakarías Herman Gunnarsson, Óskar Pétursson, Stefanía Svavarsdóttir, Eiríkur Hauksson, Dísella Lárusdóttir og Júníus Meyvant.

„Hver veit nema óvæntur gestur komi í heimsókn,“ segir í tilkynningu tónleikahaldara.