Maður hefur verið sakfelldur í Héraðsdómi Reykjavíkur fyrir að hafa ráðist á barn í sal kvikmyndahúss Sambíóanna í Kringlunni. Átti þetta sér stað á fullveldisdaginn, 1. desember 2023.

Umrætt barn er drengur en aldur hans kemur ekki fram í dómi Héraðsdóms. Maðurinn var upphaflega ákærður fyrir líkamsárás og brot gegn barnaverndarlögum með því að hafa veist með ofbeldi að drengnum. Það hafi hann gert með því að taka í hálsmál peysu drengsins og togað hann að sér, með þeim afleiðingum að hann rakst í sæti, og haldið honum á meðan maðurinn öskraði á drenginn að þegja og síðan hent honum aftur í sætið, með þeim afleiðingum að drengurinn hlaut mar á höfði upphandlegg og læri. Með þessari háttsemi hafi maðurinn beitt drenginn ógnunum og sýnt honum vanvirðandi háttsemi, yfirgang og ruddalegt athæfi.

Undir rekstri málsins fyrir héraðsdómi voru nokkrar breytingar gerðar á ákærunni en þær fólust í maðurinn var ekki lengur sagður hafa öskrað á drenginn að þegja og hann var eftir þessar breytingar sagður hafa sleppt drengnum aftur í sætið en ekki hent honum.

Maðurinn játaði skýlaust en gerði kröfu um að honum yrði ekki gerð refsing. Hann hafði ekki áður gerst sekur um refsiverða háttsemi og því þótti héraðsdómi hæfilegt að dæma hann í 30 daga skilorðsbundið fangelsi.

Krafist var miskabóta fyrir hönd drengsins, 1,5 milljóna króna. Dómnum þótti hins vegar hæfilegt að dæma manninn til að greiða drengnum 250.000 krónur í miskabætur auk vaxta og dráttarvaxta.