Stjórnvöld í Namibíu hafa tilkynnt að til standi að slátra um 700 villtum dýrum vegna vaxandi erfiðleika við að fæða alla þjóðina en í landinu geysa nú mestu þurrkar síðustu 100 ára.

CNN greinir frá þessu. Ætlunin er að slátra meðal annars 83 fílum, 30 flóðhestum, 60 vísundum, 50 antilópum, 100 gnýjum og 300 sebrahestum. Það var ráðuneyti umhverfis- ferða-, og skógræktarmála sem tilkynnti opinberlega um þetta síðastliðinn mánudag.

Atvinnuveiðimenn eiga að fanga dýrin og verður það gert í þjóðgörðum og á svæðum þar sem þykir sjálfbært, miðað við fjölda dýra, að stunda slíkar veiðar.

Neyðarástandi vegna þurrka var lýst yfir í landinu í maí síðastliðnum. Talið er að hálf namibíska þjóðin, 1 og hálf milljón manna, glími við mikinn matarskort vegna þurrkanna.

Segir ráðuneytið að slátrunin muni minnka aðsókn dýra í vatn og verði þau einkum veidd á svæðum þar sem ekki er nægilegt vatn og gróður til að fæða þann fjölda dýra sem lifir þar.

Er ætlunin einnig að draga úr árekstrum milli sérstaklega fíla og manna en í slíkri þurrkatíð aukast líkurnar á auknum núningi þarna á milli þegar fílarnir leita sem víðast að vatni.

Namibía er í sunnanverðri Afríku en í þeim hluta álfunnar eru um 200.000 fílar en hundruðir fíla eru taldir hafa drepist undanfarið ár vegna þurrka.

Fílakjötinu og kjöti af hinum tegundunum verður dreift til þeirra íbúa landins sem glíma við mestan matarskort.

Nú þegar hefur 125 dýrum verið slátrað og kjötinu af þeim dreift til mannfólks í mestri þörf fyrir mataraðstoð.

Lýsti ráðuneytið yfir ánægju sinni með að hægt væri að aðstoða hungraða íbúa Namibíu með þessum hætti.