Eitt sérkennilegasta mál síðari tíma er kaup ríkisbankans Landsbankans á einkarekna tryggingafélaginu TM. Svarthöfði skildi ekki þá og skilur ekki enn hvernig stjórnendum bankans fannst það góð hugmynd að kaupa tryggingafélag og bæta því undir hatt ríkisins. Látum það vera.

En upp frá þessum kaupum hefur spilast út farsi sem engan enda ætlar að taka. Bankastjórinn bendir á bankaráð, bankaráð segist hafa talað við Bankasýsluna. Bankasýslan segir að enginn hafi talað við sig – að minnsta kosti ekki formlega – en ákvað að skipta út bankaráðinu. Svarthöfða sýnist blasa við að nýtt bankaráð sem kosið verður á föstudag, með lands- og jafnvel heimþekktum ofurmennum í bankarekstri og fjármálum, muni finna nýjan bankastjóra og jafnvel fleiri stjórnendur í framhaldinu. Svo á að meta fýsileika kaupanna og hvort ekki væri allra best að selja bara Tryggingafélagið aftur.

Fjárlaganefnd Alþingis hefur óskað eftir upplýsingum um hver samskipti fjármálaráðuneytis og bankasýslunnar voru í aðdraganda kaupanna. Sú ósk var sett fram fyrir einum mánuði en ekkert svar borist segir í Vísi í dag.

Fyrirspurnarkóngur Alþingis sem situr í nefndinni, Björn Leví Gunnarsson, Pírati, telur að svar muni ekki berast. Af öllum er Birni Leví best treystandi til að meta líkur á svari, svo margreyndur sem hann er á sviði fyrirspurna – og svara.

Hann segir skorta á heildarmynd í málinu. Það má svo sem taka undir það með Birni Leví. En miklu fremur skortir á heimildarmynd um málið, því kostulegt er það og bætir í með hverri vikunni sem því vindur fram.