Hreingerningarmaður fann nýlega tvö barnslík þegar hann var að þrífa auða íbúð í Hong Kong. Líkin voru í sitt hvorri glerflöskunni að sögn lögreglunnar.

Metro skýrir frá þessu og segir að flöskurnar hafi verið 30 cm á hæð og að líkin hafi ekki verið með neina augljósa áverka.

Talsmaður lögreglunnar sagði að krufning muni fara fram til að skera úr um dánarorsökina og hvort þau hafi fæðst andvana.

24 ára karlmaður og 22 ára kona voru handtekin vegna málsins. Þau bjuggu í íbúðinni og eru talin vera par.

Íbúðareigandinn sendi hreingerningarmanninn í íbúðina á föstudaginn eftir að parið flutti út.