Orðið á götunni er að ríkisstjórnin muni halda velli þrátt fyrir ólund nokkurra ósáttra þingmanna Sjálfstæðisflokksins. Bjarni Benediktsson, formaður flokksins, leyfir þeim ekki að fella Svandísi vegna þess að þá fellur ríkisstjórnin. Bjarni vill halda þessari nánast dauðu ríkisstjórn saman fram á næsta ár. Það hentar honum sjálfum. Hann trúir því að rofa muni til síðar á þessu ári og hann vill trúa því og hann vill halda þessu áfram og vonast eftir betri tíð á árinu 2025. Bjarni Benediktsson er ekki á förum úr íslenskum stjórnmálum eins og sumir hafa haldið fram. Þeir sem líta hýru auga til formannsstólsins í Sjálfstæðisflokknum þurfa að bíða enn um sinn. Bjarni vonar að á næstu tveimur til þremur árum komi fram einhver nothæfur forystumaður þessa flokks. Enginn slíkur en nú í sjónmáli.
Bjarni Benediktsson ræður því sem hann vill ráða í flokknum. Þótt einhverjir minnipokamenn í þingflokknum bauli nú að Svandísi mun það engu breyta. Þeir vita það einnig sjálfir þó að þeim finnist mikilvægt að stimpla sig inn með skoðanir á misgjörðum Svandísar. Það er til heimabrúks innan flokksins sem er nú þegar í mikilli niðursveiflu.
Þeir sem hafa nú í hótunum vegna brota Svandísar vita að núverandi stjórnarmeirihluti í vinstri stjórnar Katrínar er með 38 þingmenn á bak við sig. Þannig þyrftu sjö þingmenn að láta af stuðningi við ríkisstjórnina og kjósa með stjórnarandstöðunni til að samþykkja vantraust á Svandísi. Þetta er þá miðað við að allir þingmenn stjórnarandstöðunnar væru til í að fella hana. Það er heldur ekki víst. Ekkert bendir til þess að þetta gæti gerst.
Bjarni Benediktsson brosir bara út í annað og leyfir minnipokamönnum í þingflokknum að slá um sig með einhverjum ávirðingum á hendur Svandísi. En ekkert mun gerast þótt Óli Björn Kárason, Jón Gunnarsson og fleiri slíkir kvarti með einhverjum hætti. Þeir munu ekki segja af sér þó að Svandís sitji sem fastast þrátt fyrir ítrekuð lögbrot. Þeir munu svo þagna og gæta að sínum ríflegu þingmannslaunum og eftirlaunum. Þeir munu ekki víkja.
Orðið á götunni er að Bjarni Ben hafi alger tök á sínu liði. Það veit Svandís og er sallaróleg þrátt fyrir ágjöf nú um stundir.
Bjarni mun halda lífinu í þessari dauðvona ríkisstjórn fram á árið 2025.
Svanhildur Hólm og Logi Bergmann verma stólinn hans í Washington þar til honum hentar að hætta og fara þangað. Þá verður þeim skákað til Færeyja eða Helsinki.
