„Dauða yfir ferðatöskum á hjólum,“ stóð á dreifimiða sem var nýlega dreift í frönsku Miðjarðarhafsborginni Marseille. Þessi sami texti gæti allt eins hafa verið á límmiða á húsvegg í Barcelona, Amsterdam eða Feneyjum.
Eftir mögur ár í ferðamannaiðnaðinum á tíma heimsfaraldurs kórónuveirunnar reyna margar evrópskar stórborgir að lokka efnaða ferðamenn í heimsókn. En það er ekki alls staðar tekið vel á móti ferðamönnum.
Það er auðvitað gott fyrir efnahagslífið að fá ferðamenn en það er ekki endilega gott fyrir heimamenn því þeir eiga erfitt að ráða við þær verðhækkanir sem fylgja ferðamönnum.
Í Marseille hefur hópur aðgerðasinna gripið til nokkuð róttækra aðgerða í baráttunni gegn þeim mikla fjölda íbúða sem eru leigðar út í gegnum leigumiðlunina Airbnb.
Á síðustu vikum hefur hópurinn stolið að minnsta kosti 40 lyklaboxum og límt önnur aftur þannig að ekki er nokkur leið að opna þau. En það er jafnvel enn verra fyrir leigusalana að hópurinn hefur dreift flugmiðum sem nöfn leigusala og ljósmyndir af þeim eru á. Eru leigusalarnir sakaðir um að vera að drepa hverfin sín.
Staðarblaðið Marsactu segir að nú séu 11.000 Airbnb íbúðir í miðborg Marseille.
Pirringur í garð ferðamanna er ekki bundin við Frakkland, þetta sama vandamál er einnig að finna í fjölda vinsælla stórborga.
Barcelona var ein af fyrstu borgunum sem tókst á við hópa partíglaðra ferðamanna. Þeir höfðu hátt allar nætur vikunnar í íbúðarhverfum þar sem heimafólk vildi bara sofa svefni hinna réttlátu til að geta mætt til vinnu næsta dag.
Á þessu ári hafa ferðamenn flætt yfir borgina með tilheyrandi hækkun á leiguverði og löngum biðröðum við almenningssamgöngutæki. Borgaryfirvöld hafa því hert reglurnar varðandi útleigu í gegnum Airbnb og ferðamannaskatturinn hefur verið hækkaður og takmörk sett á fjölda ferðamannahópa sem mega vera í borginni hverju sinni. En þetta hefur ekki dugað til að gera út af við pirring heimamanna í garð ferðamanna.
Í vinsælustu hverfunum þekur veggjakrot, sem er beint til ferðamanna, veggi. Til dæmis með textum á borð við: „Við hrækjum í bjórinn þinn, skál!“ eða „Lúxusuferðin þín er eymd mín“ eða einfaldlega „Ferðamenn, hypjið ykkur heim, vasaþjófar eru velkomnir.
