Gylfi Þór Sigurðsson spilaði tæpan hálftíma þegar Lyngby var slátrað af Silkeborg í dönsku úrvalsdeildinni í kvöld. Stefán Teitur Þórðarson, íslenski miðjumaðurinn í liði Silkeborg skoraði þrennu.

Þrenna Stefáns kom á átta mínútna kafla í fyrri hálfleik en mörkin komu með vinstri og hægri fæti og svo með skalla. Hin fullkomna þrenna.

Staðan var 4-0 fyrir Silkeborg í hálfleik en Andri Lucas Guðjohnsen og Kolbeinn Birgir Finnsson voru í byrjunarliði Lyngby. Leiknum lauk með 5-0 sigri Silkeborg.

Gylfi Þór og Sævar Atli Magnússon komu inn þegar hálftími var eftir. Gylfi var í tvígang nálægt því að leggja upp mark með góðum sendingum úr föstum leikatriðum en liðsfélagar hans náðu ekki að klára þær.

Gylfi fékk að líta gula spjaldið þegar lítið var eftir en hann kemur til Íslands um helgina og hefur undirbúning fyrir komandi landsleiki Íslands ásamt Kolbeini og Andra.

Stefán Teitur er ekki í íslenska landsliðshópnum og heldur ekki Sævar Atli Magnússon.