Samkvæmt niðurstöðum nýrrar úttektar Eurostat, sem er Hagstofa Evrópusambandsins, þá er verðið á neysluvörum hér á landi um 59% hærra en að meðaltali í Evrópu. Sviss slær Íslandi þó við hvað varðar dýrtíð en þar er verðlagði um 74% hærra en að meðaltali í Evrópu.

Þetta þýðir einfaldlega að vara sem kostar 100 evrur að meðaltali í ESB-ríkjunum er 59% dýrari hér á landi.

Morgunblaðið skýrði fyrst frá þessu. Þegar niðurstöður úttektarinnar eru skoðaðar á heimasíðu Eurostat sést að við Íslendingar greiðum einnig hátt verð fyrir samgöngur, samskipti, veitingar og gistingu.

Verðlagið í álfunni er lægst í austurhluta hennar og við Miðjarðarhaf. Til dæmis er ódýrasta áfengið og tóbakið í Búlgaríu af ESB-ríkjunum.  En dýrast er þetta hjá frændfólki okkar í Noregi en af ESB-ríkjunum tróna Írar á toppnum.

Hér geta verðlagsþreyttir Íslendingar kynnt sér niðurstöðu úttektar Eurostat.