„Fólkið þjáist eðlilega mjög mikið. Það sem er mikilvægast núna er að útskýra stöðuna því þetta er mjög óvenjulegur atburður,“ sagði Gerard Pokruszynski, sendiherra Póllands á Íslandi, í samtali við DV, að lokinni bænastund sem haldin var í Landakotskirkju fyrr í dag. Bænastundin var haldin til stuðnings móður manns sem ráðinn var bani á bílastæðinu fyrir utan Fjarðarkaup að kvöldi sumardagsins fyrsta.
„Fjölskyldan ræður því hvernig staðið verður að málum en sem fyrst viljum við vita hvað gerðist. Við vitum núna að þetta gerðist á sumardaginn fyrsta um miðnætti. Við vitum ekkert annað,“ segir Gerard. Aðspurður segist hann vera í góðu sambandi við lögregluna. „Já, ég er í góðu sambandi við lögregluna en ég geri mér grein fyrir því að á þessu augnabliki eru þeir að bíða eftir upplýsingum.“ Segir hann að í byrjun hafi lögreglan ekki vitað að hinn látni væri Pólverji. Gerard segir að nafn hins látna verði ekki gefið upp að sinni. Hann segir aðspurður að maðurinn sé um þrítugt og hafi unnið á Íslandi. Hann er ekki með upplýsingar um hvað lengi maðurinn hefur dvalist á Íslandi.
Kristófer Gajowski skipulagði bænastundina. Kristófer er Pólverji sem talar góða íslensku. Prestur pólska safnaðarins á Íslandi flutti hugvekju á pólsku en Kristófer talaði á íslensku. Þar sagði hann að allt samfélagið væri slegið yfir þessum atburði, jafnt Pólverjar sem Íslendingar. Við værum komin saman til að sýna stuðning, kærleika og fyrirgefningu. Hinn látni væri ungur maður sem hefði viljað vinna og skemmta sér, eins og annað fólk. Atburðurinn væri óskiljanlegur, en hann vekti spurningar um hvernig fólk elur upp unglingana sína, hvort það sé æskilegt að þau fái að gera það sem þau vilja.
Fjögur ungmenni eru í haldi lögreglu vegna málsins, þrír piltar og ein stúlka. Samkvæmt heimildum eru þau öll undir tvítugu. Hinn látni var stunginn mörgum sinnum samkvæmt upplýsingum frá lögreglu.
Um 40 manns voru við athöfnina, fjölskylda hins látna, blaðamenn og einnig fólk sem tengist manninum ekki neitt, bæði Íslendingar og Pólverjar. DV hitti stuttlega að máli konu sem heitir Guðbjörg og ók frá Hafnarfirði til að vera viðstödd athöfnina. Hún sagðist vilja sýna Pólverjum samstöðu á erfiðri stund sem þessari. „Pólverjar eru Íslendingar,“ sagði Guðbjörg í samtali við blaðamann en hún hefur haft mjög góð kynni af Pólverjum á Íslandi.
