Alls eru 26,9 prósent íbúðalána hérlendis með breytilega óverðtryggða vexti. Þetta kemur fram í forsíðufrétt Fréttablaðsins í dag þar sem rætt er við Þorbjörgu Sigríði Gunnlaugsdóttur, þingmann Viðreisnar, sem segir að fjöldinn sé stærri en talað hefur verið um. Hún óskaði eftir upplýsingum frá Seðlabankanum um stöðu mála og bárust svör á dögunum.

Það þýðir að þessi hluti íbúðaeiganda er að taka á sig vaxtahækkanir Seðlabankans að fullum þunga en á síðasta vaxtaákvörðunardegi ársins hækkaði bankinn stýrivexti um 0,25%. Það þýðir að stýrivextir hafa nú samtals hækkað um 5,25 prósentur frá því vaxtahækkunarferli bankans hófst í maí 2021.

Þá eru að  auki eru ríflega 4.000 heimili með íbúðalán á föstum vöxtum sem koma til endurskoðunar árið 2024.

Í samtali við Fréttablaðið segir Þorbjörg Sigríður að tölurnar séu athyglisverðar í ljósi svara sem hún fékk á dögunum um að 250 íslensk fyrirtæki geri upp í erlendri mynt. „Maður fær þá tilfinningu að það séu tvær þjóðir í þessu landi. Það sé almenningurinn sem taki á sig þessar vaxtahækkanir og þá erfiðleika sem á okkur dynja en að hluti atvinnulífsins geti valið sér leið fram hjá krónuhagkerfinu og þeim kostnaði sem því fylgir,“ segir Þorbjörg.

Að hennar mati þarf að kanna betur hvort að flestir þeirra sem séu með hina óverðtryggðu og breytilegu vexti séu þeir sem voru að kaupa sér sína fyrstu eign.