Nýlega voru fjölmenn mótmæli í Mexíkóborg gegn drápum á konum. Boðað var til þeirra eftir að lík Ariadna Lopez, 27 ára, fannst í skurði í Morelos. Lögreglan sagði í fyrstu að hún hefði látist af völdum áfengisneyslu.
Fjölskylda hennar var ekki sátt við þessa skýringu og tóku lögreglumenn í Mexíkóborg málið því til rannsóknar. Rannsóknin leiddi í ljós að á líkinu voru greinileg merki um ofbeldi.
Claudia Sheinbaum, borgarstjóri í Mexíkóborg, sagði í framhaldi af þessari niðurstöðu að augljóst væri að saksóknari í Morelos hafi viljað leyna því að um morð hafi verið að ræða, líklega vegna tengsla hans við meintan morðingja.
Málið vakti mikla athygli um allt land og gagnrýni rigndi yfir yfirvöld sem eru sögð óhæf, getulaus, óheiðarleg og ekki fær um að sinna starfi sínu. Ekki aðeins í þessu máli heldur öllum málum er tengjast morðum á konum.
Reuters segir að á fyrstu níu mánuðum ársins hafi 5.600 konur verið drepnar í landinu. Það eru að meðaltali 20 konur á dag.
Helmingur málanna er flokkaður sem manndráp af gáleysi eða manndráp og þriðjungur sem morð. 12% er lýst sem „kvennamorði“.
Samkvæmt lögum eru refsingar þyngri vegna afbrota sem beinast gegn konum vegna kyns þeirra. Hægt er að dæma drápsmenn í allt að 70 ára fangelsi.
Reuters segir að aðeins 4% mála, þar sem konur eru drepnar, ljúki með sakfellingu.
Morðum og ofbeldisverkum fjölgar ár frá ári í Mexíkó. Mun fleiri karlar eru myrtir en konur en skýringuna á því má finna í tengslum þeirra við átök glæpagengja.
En morðum á konum hefur fjölgað meira hlutfallslega. Frá 2015 til 2020 fjölgaði morðum um 78%. En á sama tíma fjölgaði morðum á konum um 129%,
