Í mati frá þýsku sambandsríkislögreglunni kemur fram að ekki sé útilokað að erlent ríki hafi staðið á bak við skemmdarverk á merkjakerfi þýsku járnbrautanna á laugardaginn. Þá stöðvaðist nær öll lestarumferð um norðanvert landið.

Þetta kemur fram í hættumati sambandsríkislögreglunnar sem Bild hefur komist yfir.

Skemmdarverkin á merkjakerfinu voru unnin aðeins tveimur vikum eftir að göt voru sprengd á Nord Stream 1 og 2 gasleiðslurnar í Eystrasalti.

Í samtali við Bild í gær varaði Carsten Breuer, sem er yfirmaður nýrrar deildar sem berst gegn hryðjuverkum, við árásum á þýska innviði. Hann sagði að hjá deildinni beinist sjónir fólks aðallega að „blönduðu stríði“. „Það er ástand sem ekki er hægt að skilgreina sem frið en heldur ekki sem alvöru stríð,“ sagði hershöfðinginn sem hefur alla hermenn í Þýskalandi undir sinni stjórn.

Hann stýrir nýju deildinni sem hefur bækistöðvar í Berlín og á að samhæfa aðgerðir hersins ef til náttúruhamfara eða árásar kemur.

Núna er það blandað stríð sem deildin hefur mestar áhyggjur af. Í því geta falist árásir á innviði, tölvuárásir eða drónaflug  yfir herstöðvum. „Sem sagt, litlar aðgerðir, sem hafa að markmiði að vekja óvissu meðal almennings og veikja traustið á yfirvöldum,“ sagði hann og bætti við að blandað stríð samanstandi oft af litlum aðgerðum.

En þrátt fyrir að sjónir margra beinist að Rússum þegar kemur að skemmdarverkum þessa dagana þá útiloka þýsk yfirvöld ekki að vinstrisinnaðir hópar geti hafa verið að verki. Þeir hafi lengi beint sjónum sínum að þýsku járnbrautunum því þær sjá um flutninga á jarðefnaeldsneyti.