Guðbjörg Glóð Logadóttir, stofnandi og eigandi Fylgifiska á heiðurinn af þessum dásamlega fiskrétti þar sem laxinn er í aðalhlutverki. Lax er tilvalinn til þess að bjóða fólki í mat eða bara handa fjölskyldunni og einstaklega kærkominn á fimmtudagskvöld svona rétt fyrir helgina. Guðbjörg Glóð á heiðurinn af vikumatseðli Fréttablaðsins þessa vikuna og bauð meðal annars upp á þessa dásamlegu uppskrift sem er bæði einföld og ótrúlega ljúffeng þar sem brögðin heilla bragðlaukana.

Guðbjörg Glóð er mikill sælkeri og kann að gera vel við sig og son sinn þrátt fyrir að þau séu með sinn hvorn matarsmekkinn. „Minn uppáhalds matur er oftast flókinn í bragði meðan sonur minn kýs einfalt bragð,“ segir Guðbjörg Glóð.

Ofnbakaður lax með basil & lime

4 stk – 250 g laxasteikur með roði

1 dl olía að eigin vali

2 msk. Moroccan RUB frá NOMU

1 stk. lime – raspið börkinn (má sleppa)

½ stk. lime – pressa safann

1 lauf pressaður hvítlaukur

Salt & pipar eftir smekk

3 msk. saxað basil

Hrærið öllu saman í skál nema ferska kryddinu og hellið yfir laxa steikurnar. Látið

marínerast í 30 – 60 mínútur í kæli. Forhitið ofninn í 180°C. Bakið laxinn í 12 mínútur í heitum ofninum. Ef þið eigið ferskt eða frosið mangó er ekki verra að baka það með og fá þannig sætu á móti súra bragðinu. Stráið ferska kryddinu yfir þegar laxinn kemur úr ofninum. Gott er að hafa lime sneiðar á borðinu svo hver og einn geti kreist yfir.

Köld sósa

2,5 dl sýrður rjómi

2 msk. sítrónusafi

1 tsk. Robiniu hunang frá Alfreð Gísla

1 msk. smátt saxað basil

Allt hrært saman og gott að kæla aðeins í ísskáp áður en sósan er borin fram.

Laxinn er góður með sætkartöflumús eða ofnbökuð grænmeti & salati.