Formenn félaga innan Starfsgreinasambands Íslands hafa sent frá sér yfirlýsingu í tilefni þess að Drífa Snædal sagði af sér sem formaður ASÍ.

Drífa sagði af sér með vísan til þess að hún treysti sér ekki til að starfa áfram innan verkalýðshreyfingarinnar. Einkum vegna spennu sem hafði myndast milli hennar og Sólveigar Önnu Jónsdóttur, formanns Eflingar, og Ragnars Þórs Ingólfssonar, formanns VR.

Vilhjálmur Birgisson er núverandi formaður Starfsgreinasambandsins (SGS)en hann skrifar þó ekki undir yfirlýsinguna sem var send fjölmiðlum.

„Við undirritaðir formenn félaga innan Starfsgreinasambands Íslands viljum þakka fráfarandi forseta ASÍ fyrir farsælt og gefandi samstarfs undanfarin 10 ár. Fyrst með flestum okkar sem framkvæmdastjóri SGS og síðustu fjögur ár sem forseti ASÍ.

Drífa hefur verið róttæk, sýnileg og fylgt áherslum Alþýðusambands Íslands mjög vel eftir og verið hreyfingunni til sóma á allan hátt. Hún er ósérhlífin, vinnusöm og með ótrúlegum styrk hefur hún átt stóran þátt í að brjóta ýmsa múra sem hefur skilað sér m.a. í bættum lífskjörum, einkum þeirra sem minnst hafa, auknu jafnrétti og betra samfélagi.

Jafnframt hörmum við þær aðstæður er urðu til þess að hún sá sig knúna til afsagnar. Það á enginn að þurfa að upplifa sig við þannig aðstæður á sínum vinnustað. Verkalýðshreyfingin á að vera fyrirmyndar vinnustaður og verður að koma í veg fyrir að starfsfólk hennar upplifi sig eins og Drífa gerði.

Arnar G. Hjaltalín
Björn Snæbjörnsson
Eyþór Þ. Árnason
Finnbogi Sveinbjörnsson
Guðmundur Finnbogason
Guðrún Elín Pálsdóttir
Halldóra S. Sveinsdóttir
Hrund Karlsdóttir
Magnús S. Magnússon
Vignir S. Maríasson
Þórarinn Sveinsson“