Það hefur lengi verið vitað að kolkrabbar eru mjög greindir. Þeir eru svo greindir að þeim hefur verið líkt við spendýr hvað varðar vitsmuni, þrátt fyrir að þeir séu allt öðruvísi en spendýr.

Vísindamenn telja sig nú hafa fundið ákveðin líkindi með kolkröbbum og mönnum og telja að þetta geti skýrt hina miklu greind kolkrabba.

Þetta kemur fram í fréttatilkynningu frá rannsóknarhópnum Stazione Zoologica Anton Dohrn í Napólí á Ítalíu. Rannsókn hópsins hefur verið birt í vísindaritinu BMC Biology.

Niðurstöður hennar sýna að tvær tegundir kolkrabba eru með sama erfðaefnið ,sökkul (transposon), og er að finna í mannsheila.

Vísindamennirnir segja að fyrri rannsóknir hafi sýnt að rúmlega 45% af erfðaefni manna sé byggt á sökklum en þeir hafa verið kallaðir „hoppandi gen“. Þetta viðurnefni er tilkomið vegna þess að þau geta fært sig til í erfðamenginu, eru hreyfanleg gen, og myndað aðrar stökkbreytingar.

Stærsti hlutinn af þessum „hoppandi genum“ er þó óvirkur en meðal þeirra mikilvægustu í þessum hópi eru sökklarnir í svokallaðri LINE-fjölskyldu að sögn vísindamannanna. Þeir segja að þessir sökklar geti enn verið virkir í mönnum.

Vísindamennirnir segja að margir vísindamenn telji að LINE sökklarnir tengist hugrænni getu, á borð við að geta lært og munað, hjá mönnum. Það vakti því áhuga þeirra þegar þeir fundu hluta af LINE-fjölskyldunni í þeim hluta heila kolkrabba sem skiptir öllu fyrir hugræna getu þeirra.

Videnskab segir að Giuseppe Petrosino, einn vísindamannanna, segi að þessi líkindi á milli manna og kolkrabba geti verið „heillandi dæmi um samleitna þróun“. Það  er fyrirbæri þar sem sama sameindaferlið þróast, sem svar við sömu þörfinni, í tveimur fjarskyldum tegundum.